Fatahaado kale oo laga cabsi qabo in ay ku dhuftaan Baladweyne

0

(ERGO) – Waxaa walaac xooggan laga muujinaayaa in mar kale ay fatahaado ku dhuftaan magaalada Baladweyne ee xarunta gobolka Hiiraan, iyadoo boqollaal dadkii ka soo barakacay fatahaaddii ku dhufatay dhowr xaafaddood oo ka tirsan magaalada ay weli ku sugan yihiin duleedka magaaladaas.

Webiga Shabeelle ayaa bishii la soo dhaafay ku fatahay qaybo badan oo ka tirsan magaalaada oo ay ka mid yihiin xaafadda 4aad iyo garoonka dayuuradaha ee magaaladaas. Dowladda Soomaaliya oo kaashanaysa hay’addaha gargaarka iyo dadka shacabka ah ee ku nool gobollada kala duwan ee dalka ayaa gargaar gaarsiisay magaalada.

Marka laga soo tago in gurmad xooggan uu soo gaaraayo magaalada ayaa haddana waxaa jiro isbarbaryaac ah in gurmadka la keenay intii badan uu isku mid yahay, sidaa uu Raadiyow Ergo u sheegay Cabdulaahi Nuur Cusmaan, oo ah madaxa Hay’adda gargaarka ee Hormuud foundation.

“Tirada rasmiga ah ee dadka barakacayna la ma haayo, samafalka dadka la soo gaarsiinayana intiisa badan waa hal nooc, wuxuuna u badan yahay raashin iyo daawooyin,” ayuu yiri Cabdulaahi.

Sarkaalkan ayaa sheegay in weli cabsi laga qabo in ay da’aan roobab kale oo daadad wata oo barakicin kara qoysas kale. Cabdulaahi ayaa sheegay in weli xaafaddaha qaar ay go’doon yihiin, iyadoo ay biyuhu xadideen isu socodka dadka iyo gaadiidka.

“Dadku wali ma soo noqonin, gargaar xoogan ayaa dadka la soo gaarsiiyay, intiisa badanna ka imaanayay dadka Soomaaliyeed balse waxaa jirtay isku xirnaan la’aan iyo is barbar yaac. Waxaa jirta tuulooyin badan oo laga barakacay oo walina aysan jirin wax gargaar ah oo gaaray,” ayuu yiri Cabdulaahi.

Post your comments

Jawaab ka bixi

Please enter your comment!
Please enter your name here