Sool: Boqollaal carruur ah oo ku nool xerada lagu barakacay oo wajahaayo waxbarasho-la’aan

0

(ERGO) – Boqollaal carruur ah oo ku nool xerada lagu barakacay oo ku taalla deegaanka Darya-geesa, kana tirsan degmada Xuddun ee gobolka Sool ayaa wajahaayo waxbarasho-la’aan. Deegaanka ay dadkan soo degeen dhammaadkii sannadkii 2016-kii kuma yaallaan xarumo waxbarasho. Waxaa xarun waxbarasho ugu dhow oo dadka deegaanka ee awooda ay carruurtooda u dirsadaan magaalooyinka Xuddun oo 40km u jirta iyo Laascaanood.

Qoysaskan oo ah xoolo-dhaqato ku cayrtoobay abaarihii isxig-xigay ee dalka ku dhuftay ayaa waxay ka soo barakaceen miyiga Shimbiraaley, Hidhaanshiile iyo Dob-shabeel oo hoostaga Xuddun.

Yaxye Maxamed oo aabbe u ah sagaal carruur ah oo dhamaantood gaaray da’da waxbarasho ayaa Raadiyow Ergo in ay carruurtu iska joogaan guriga oo aysan wax barasho aadin. Waxaa Yaxye iyo waaliddiinka kale welwelkooda ugu wayn waxaa uu yahay in ay carruurta uga dhacaan ceelal dhaadheer oo ay ku ag ciyaaraan marka ay fasaxaan. Wuxuu xusay in dhowr carruur ah ay sanadkaan ceelal ku dhaceen.

“Intaa ogahay ilaa laba caruur ah ayaa bishii hore keliya ku dhacay oo mid ka mid ah dirqi lagaga soo saaray waa ku dhaawacmeen kuwaa ku jajabay, qaar waxay keeneen inay balwada bartaan. hadday buuri helaan, xashiishad, iyo kuwo cuna garaabada qaadka intay tagaan meelaha lagu qayilo,”ayuu yiri Yaxye oo sheegay in ay ku baraarugsan yihiin waalidiintu muhiimadda ay waxbarashadu ubadka u leedahay. Nolosha qoyskiisa ayaa hadda ku tiirsan taageero raashin oo aan joogto ahayn oo uu ka helo dad ay qaraabo yihiin oo deggen Xuddun, kuwaas oo saddexdii maalinba uu mar u tago.

Safiya Barre Geelle oo dhashay toddobo carruur ah oo lix ay gaartay da’da waxbarashada ayaa ka mid ah waaliddiinta xerada deegaanka Darya-geesa-wayn ee gobolka Sool. Wiil ay dhashay oo jira 10 sano ayaa bil ka hor ka jabay inta u dhaxaysa suxulka gacanta midig ilaa cududda faraha agtooda, kaa oo hadda lagu kabay lacag gaaraysa kun doollar oo ay daymiyeen dad ay qaraabo yihiin.

“Carruurtii hawshoodii waa badatay oo waxbarasho ma haystaan caqabadaha naga haysata waxaa ka mid ah ceelasha ay ku dhacayaan, waa is laynayaan, waxay ahaayeen markii hore caruuur aduun miyi ku haysata oo xoolaha raaci jiray,” ayay tiri Safiyo.

Safiya Barre waxay sanadkii 2017 ka hor, lahayd 300 oo neef oo ari ah oo dooxada Shimbiraalay oo 15 km Xuddun u jirta ku dhaqan jirtay. Siddeed neef oo ido ah oo xoolihii uga haray ayay ku darsatay reer ay qaraabo yihiin.

Hay’ado aysan dadku magacooda saxda ah noo sheegin ayaa mararka qaar gargaar ka bixiya xerada. Safiyo waxay sheegtay in bishii Oktoobar ay hay’ad ka mid ah kuwaas siisay $70 oo gargaar ah. Deegaanka waxaa ku yaalla afar ceel oo lacag la’aan ay dadku biyaha uga cabaan, taas oo ah sababta ugu weyn ee ay halkaas ugu barakaceen. Xerada Darya-geesa-wayn oo ah tan keliya ee deegaanka ku taalla ayaa la sheegay in ay ku nool yihiin 200 oo qoys.

Post your comments

Jawaab ka bixi

Please enter your comment!
Please enter your name here