Gedo: Webiga Jubba oo ku fatahay beero ku yaallo 53 tuulo

0

(ERGO) – In ka badan 2,000 oo ku teedsanaa webiga Jubba ayaa ku baaba’ay fatahaad ka dhalatay kaddib markii uu webiga karkaarada jebiyay. Beerahaan oo ay ku tiirsanaayeen in ka kabadan 7,000 ayaa waxaa ay ku kala yaaleen 53 tuulo oo hoostaga degmada Baardheere ee gobolka Gedo.

Dalagyada ay biyaha webigu qaadeen oo ku yaallay 2221 beerood ayaa kala ah moos, Bocor,Cambo,liin dhanaan yaanyo, basal, bataati, kabsar caleen, basbaas, qare, digir, galley iyo sisin.

Balash Nuunow oo ah 58 jir ku nool tuulada Kukato oo dhaw Baardheere waxay fatahaaddu ka baabi’isay 10 hektar oo uu ku beertay qudaar iyo gallay.

“Waxaa iigu yaallay khudaar kala duwan, aan ugu talogalay Bisha 11aad ee sanadkan, dalagii magaalada la keeni lahaa waaye, marka tii Ilaahay baa dhacday, waxaan hayana ma leh,” ayuu yiri Balash oo in 29 sano beeralay ahaa.

Balash oo beertiisa ay biyaha la tageen bishii la soo dhaafay ayaa laba xaas iyo 14 carruur ah waxaa uu keenay Baardheere si uu uga raadiyo nolal dhaanta mida tuulada.

Balash ayaa Raadiyow Ergo u sheegay $1200 uu ku qarashgareeyay beertiisa ka hor inta aysan biyuhu la tegin.

Waxaa isna qasaaro intaa laeg uu soo gaaray Cabdiraxmaan Xaaji Maxamed Ismaaciil oo ah 60 jir ku nool tuulada Mardhaa oo Baardheere 9 km kaga toosan dhanka waqooyi. Cabdiraxmaan ayaa Raadiyow Ergo u sheegay in ay biyuhu kala tageen dalagyo kala duwan oo qiimo ahaan gaara $1,500.

“Fatahaada ka hor beertayda waxaa iigu yaallay dalagyo ay ka mid yahiin basal, moos, babaay, digir,Bocor. kabsar caleen, Bataati iyo barbarooni oo qorshahayga uu ahaa inaan u iib keeno degmada Baardheere, waxaan is lahaa qaar deemaha isaga bixi, kuwa kalena tacabkaaga ku xooji, balse nasiib daro fatahaadii webiga ayaa dhacday,” Cabdiraxmaan.

Dalagyadaan ay biyuhu baabi’iyeen ayaa ahaa kuwii la abuuray bilihii Ogosto iyo Septembar.

Gudiga Iskaashatada beeralayda Baardheere ayaa khasaaraha soo gaarey beeralayda waraabka Baardheere ayaa waxay ku sheegeen in ka badan $975,000.

Post your comments

Jawaab ka bixi

Please enter your comment!
Please enter your name here