Haweenka uurka leh ee ku nool Cabudwaaq oo ka faa’iidaystay adeegyo caafimaad oo lacag la’aan ah

0

(ERGO) – Nasra Bishaar waxaa ay ka mid noqotay dhowr haween oo adeeg caafimaad oo bilaash ah ka helay isbitaal si gaar ah loo leeyahay oo ku yaalla magaalada Cabudwaaq kaddib muddo ay dadka magaalada la daalaan dhacayeen adeeg caafimaad la’aan ka dhalatay xiritaankii xarunta hooyada iyo dhallaanka.

Soddon iyo labo saac oo ay foolanaysay kaddib waxay dhaqaatiirka isbitaalka Cabudwaaq General Hospital ku guulaysteen qaalliin lagu kala badbaadinaayay  Nasro iyo ubadka caloosheeda ku jiray.

“Marki hore dhaqaatiirtu waxa ay isku dayeen in iyaga oo aan iqaliin ay sida kale ii badbaadiyaan wayna suurto gali waysay, markii ilmaha ay kafka soo dhaafi waayeen markaas ayay dhaqaatiirtu go’aan gaareen qaliin,” ayay tiri Nasra, ayadoo intaas ku dartay “Markii aan foolanayay madaxa ayay wax k agaareen, qayb ka mid ah madaxa ayaa dhinac u dheereed laakiin la tacaal badan kaddib hadda madaxeedu wuu aruuray wayna wanaagsan tahay.”

Nasro oo inta aysan umulin ka hor lahayd goob ganacsi oo shaxa iyo cunooyinka fudud lagu kariyo. Waxaa ay hadda sheegtay in ay ka heli jirtay celcelis ahaan 30 kun oo shilin Soomaali ah.

Sidoo kale waxaa isbitaalkan ku dhalay Xamdi Maxamed Axmed oo muddo lix maalin ah ku foolanaysay deegaanka Yamaarugley. Waxaa ay sheegtay in dad eheladeeda ah oo Cabudwaaq joogay ay u sheegeen in adeeg caafimaad oo bilaash ah ka heli karto isbtaal ku yaal magaalada..

“Dhiiga oo igu yaraa waan dhaliwaayay dhaqaatiirtaan ayaa la igu soo xariiriyay sidaas ayaa la igu keenay halkan, iyaguna way ii gargaareen dhiig bay igu shubeen oo hal bac ah,(500) waana la i dhaliyay, aniga iyo cunigayga aad baan u wanaagsan nahay, Wax lacag ah la iga ma qaadin,” ayay tiri Xamdi oo 40 neef oo ah ku dhaqata miyiga deegaanka Yamaarugley. Inta aysan abaartu ku dhufan degaanka Xamdi waxaa haysatay 180 balse intooda badan waxaa ay le’deen abaartii.

Sida uu sheegaayo Dr Mustafe Maxamed Xasan oo gacanta ku haya qaybta adeegyada loogu qabto haweenka, Dhaqaatiirka Isbitaalka ayaa goaan ku gaaray in si bilaash ah loogu adeego haweenka uurka leh.

“Howsha way socotaa, dadka markii hore baahidu u haysay arintan ee ku fakarayay in ay caafimaad u aadaan Galkacyo, Dhusomareeb iyo Cadaado way dhamaatay halkan ayaan ugu samayna, Xilligaan aan ku lahdlayo wax yar ka hor waxaa halkan ku dhashay gabar baadiye laga keenay oo ilmo meyd ah ku jireen oo  la kurbaysnayd,” ayuu yiri Dr. Mustafe oo intaa raaciyay in celcelis ahaan maalintii 4 haween ah ay adeeg dhalmo siiyaan.

Dr Mustafe Maxamed Xasan ayaa sheegay in bilowgii hore ee barnaamijkan ay aad u yaraayeen haweenka isbitaalka kaga imaanayay miyiga maaddaama dadka reer guuraaga ah aysan ogaal u lahayn fursadan, balse bishii u danbeysay ay soo kordhayeen.

“Hal doolar xitaa xaaraanbey katahay in aan dadka laga qaadin ilaaheey dartiis ayaan ugu shaqayna dadka aan qalnay iyo kuwa caadiga udhalay. toban haween ah ayaan qaliin ku samaynay halka 30 kale ay isbitaalka si caadi ah ugu dhaleen, ” ayuu yiri Dr Mustafe oo tilmaamay in ay sii wadidoonaan barnaamijkan tabarucaadda ah inta laga helayo xarun guud oo hooyada iyo dhalaanka wax u qabata.

Bishii shanaad ee sanadkan ayaa xaruntii hooyada iyo dhalaanka ee Cabudwaaq oo ay gacanta ku haysay hay’adda IMC ay xirantay markii hay’addii maamulaysay ay ka baxday taasi oo ku qasabtay muddo laba bilood ah in haweenka xiliga dhalmada ku jira in ay socdaal ugalaan magaalooyin ka durugsan Cabudwaaq.

Post your comments

Jawaab ka bixi

Please enter your comment!
Please enter your name here