Dhallinyaro isu abaabulay dawaynta bukaannada ku nool xeryaha Muqdisho

0
87

(ERGO) – Toban dhallinyaro ah oo isxilqaamtay ayaa tan iyo sannadkii 2018 waxay xeryaha lagu barakacay ee magaalada Muqdisho ka wadaan baaris, daawo-siin iyo wacyigelin bilaash ah oo ay ugu talageen inay ka faa’iidaystaan dadka xeraha deggan ee aan awoodin in ay aadaan goobaha caafimaadka magaalada.

Cabdulqadadir Sheikh Xassan oo hormuud u ah dhallinyarada oo ku midoobay urur Saxa-dhowr lagu magacaabo ayaa Raadiyow Ergo u sheegay in bishii labo mar ay adeeg caafimaad u sameeyaan boqol qof oo ka mid ah dadka dadka deggan xeryaha ay tagaan.

Waxay toddobaadkii la soo dhaafay tageen xeryaha Dayax center, Awbaalle, Raxma, Aflax oo ku kala yaalla Degmada Kaxda, iyo deegaannada Garasbaaley iyo Waydow. Waxaa dadka ugu badan laga baaray xanuunnada malaariyada, gaaska iyo gooryaanka iyo waraabowga.

Wuxuu sheegay Cabdulqaadir inay sahmin ku soo sameeyeen xeryaha ugu badan ee baahida caafimaad ay ka jirto sidaasna ay kuwaan ugu tageen.

“Sida loo kala daranyahay ayaan u kala xulunnaa marka kaam kasta kaamkuu ka duruuf badan yahay ama ka dhibaato badan yahay ayaan dawo ugu raadinaa, qarash Meel ku tiirsannahay uu nooga yimaado majirto,” ayuu yiri Cabdulqaadir.

Dhallinyaradan oo baratay Cilmiga Caafimaadka ayuu sheegay Cabdulqaadir in ay garowsadeen in dadkooda ay uga baahan yihiin gargaar caafimaad, isagoo intaa ku daray in aysan jirin taagero lacageed ay helaan marka laga reebo isbitaallada Wehliye iyo Dooxa ee magaalada Muuqdisho oo mararka qaar siiya daawooyinka ay bukaannada u geeyaan.

 “Annaga muruqeena iyo cilmigeena ayaan diyaar lannahay, dadka qaar waxaa ay nagu saacidaan dawooyinka, hadba nambarka ayaan qabsana, waxaan ku xisaabtana dawada heeysana intey la egtahay,” ayuu yiri Cabdulqaadir.

Maleeko Nuunow Abshir oo haysta shan carruur ah waxay bishii Juune ka soo barakacday deegaanka Barbaare ee gobolka Bay halkaasi oo ay uga timid abaaro ka jira. Waxaa ka xanuunsanaa wiil ay dhashay oo 5 jir ah waxaa dhaqaatiirtan dhallinyarda ah u sheegeen inuu hayo xanuunka waraabowga iyagoo u qoray daawo ay siiso.

Waxay sheegtay in cunuggeedu uu xanuunsanayay labadii bilood ee u dambeysay islamarkaana ay awoodi waysay in ay isbitaal gayso ama daawo u gaddo duruufta haysaday darteed.

“Muslimka dawada meel kasta ka bixinaya ayaan iska qadana, cunugan ayaa xanuunsanaa, waxaa laga helay xanuunka waraabowga, labio bilood ayuu sidaa ahaa, laakiin hadda dawo ayaa la siiyay,” ayay tiri Maleeko.

Khadiijo Cabdi Maxamed oo ah hooyo heysata afar carruur ah waxay kasoo barakacday deegaanka Janaale ee gobolka Shabellaha hoose oo colaad ay ka jirto.

Waxay sheegatay in laga hayay wadnaha, iyadoo ka faa’ideysatay baaristii ugu dambeysay ee todabadkiii hore ay kasameyeen kaamka Dayax ee ku yaalla Kaxda.

“Cafimaadka waa iska roonahay laakiin wadno xanuun waa iska jira, dawo iyo daryeelkaasi nooga yimid, manaxanuunsan abadan maalin,”ayay Khadiijo.

Post your comments

Jawaab ka bixi

Please enter your comment!
Please enter your name here