Cabudwaaq: Deegaanka Dhabad oo la ciirciiraayo qoysas soo barakacay

0
85

(ERGO) – Shan boqol oo qoys oo ka soo barakacay abaaraha daran ee ka jira deegaanno ka tirsan waqooyiga Gobolka Galgaduud ayaa Muddo bil gudaheeda gaaray deegaanka Dhabad oo dhanka bariga kaga beegan 40 km Degmada Cabudwaaq Ee Gobolka Galgaduud

Qoysaskaan oo ka yimid deegaannada Kaxandhaalle, Qalaanqal iyo Dac-dheer oo hoostaga magaalada Dhabad. Waxaana roobabkii guga ee u danbeeyay iyo dayrii ka horaysay ay seegeen deegaanadooda

Nuuro Cismaan Shire oo 40 jir ah wadatana 6 carruur ah ayaa ka mid ah qoysaska dhawaan yimid deegaanka Dhabad ee Gobolka Galgaduud, Miyiga deegaanka Kaxandhaale ayay ku dhaqanaysay 150 neef oo ari ah, haddase waxa ay Dhabad la timid 7 neef oo aan nacfi lahayn sida ay Radio Ergo u sheegtay.

Safar qaatay in ka badan 48 saac ayay soo galeen Nuuro iyo qoyskeeda oo soo lugaynayay wax kabadan 40 Km oo ah inta ay isku jiraan Kaxandhaale iyo Dhabad,

“Xoolaha Duunyada Cuduro iyo baahi ayaa naga laaysay, Sidaas ayaan xoolaha ku waynay, caagado yaryar ah ayaan biyo ku soo qaadanay markii ay naga dhamaadan waxaan u tagaynay qoysaska aan jidka ku soo aragno, markasta oo biyaha aan nafta ku ceshano waan soo socnaynay sidaas ayaanmagaalada ku soo galnay,” ayay tiri Nuro oo sheegtay in ay 120 qoys ku ahaayeen safarka kuwaas oo ka soo hayaamay abaarta. Dadkan ayaa waxa ay dageen xero barakac oo qiyaastii hal Km u jirta Dhabad.

Muddada bisha ku dhow ee ay ku nool yihiin duleedka deegaanka Dhabad ayay sheegtay in habeenkii oo kaliya ay dabka saartaan wax ay cunaan oo ay ka helaan dadka deegaanka qaar oo ay qaraabo yihiin sida koombooyin bariis iyo sonkor ah,

“Laba nolol oo kala duwan weeye, Sababtoo ah dad xoolo haysta oo xoolahooda gadanayay oo shinsanayay ayaan ahayn haatana meel cidla ahayaan dhoobanahay, geedo aan soo jaray iyo maryo baaba’ ah ayaan isku dhajiyay oo aan hoy ka dhiganaa,” ayay tiri Nuuro intaa ku dartay in aysan haysan caafimaad iyo wax ay cunaan.

Ceelashii iyo warihii ay biyaha ku kaydsan jireen ayaa qalalay, Waxaana ay dantu ku riixday in ay hayaamaan.

Ceelal gacanta lagu qoday oo biyaha laga dhuri ayay si dhibleh biyaha uga heli jireen qayska Nuuro, Hayeeshe waxa ay isku badaleen kuwa gabi ahaanba biyaha laga waayay labadii bilood ee la soo dhaafay, waana taas sababata ay u soo barakacday sida ay xustay

Daahir Cisaam Xaashi waa Aabaha qoys sideed qof ah, seddex todobaad ayuu jooga deegaanka Dhabad kadib markii uu ka soo barakacay miyiga deegaanka Qalaanqal oo ku yaal xadka Soomaliya iyo Itoobiya u dhaxeeya islamarkaana deegaanka Dhabad u jira wax ka badan 30km.

Deegaanka uu ka soo barakacay ayuu sheegay in xoolihii ay uga dhamaadeen abaarta darteed, waxa uu sheegay in markii ay deegaankan yimadeen ay caawin ka heleen dadka Dhabad.

24-kii saacba hal mar ayuu sheegay in uu qoyska dabka u saaro wax ay cunnaan markaas oo uu bariis iyo sonkor uu ka helo qoysaska magaalada dagan oo qaab caawin ah u siiya.

“Waxaan ku nimid halkan 90 qoys dugsilay baan ahayn, waxaana kaam nalaga dajiyay Dhabad halkaas ayaan hadda ku sugannahay oo ku nool nahay, xoolaha kuwa ay abaartu laysay iyo qaar aan raashin ka baxsanay ayay noqdeen,”ayuu yiri Daahir.

Post your comments

Jawaab ka bixi

Please enter your comment!
Please enter your name here