Gabar ku nool Somaliland oo u dooda xuquuqda carruurta

0
149

(ERGO) – Luul Xasan Mataan waa aasaasaha xarunta darbi-jiifta ee Maxamed-Mooge oo ku taalla magaalada Hargaysa. Markii ay aragtay jidh-dilka, aflaagadooyinka iyo dayaca ay wajahayaan carruurta darbi-jiifka ah ee ku nool magaalada ayay billowday inay wax ka qabato dhibaatadooda.

Dhismaha xarunta lagu daryeelo caruurtan oo ah mida kaliya ee ku taalla Somaliland waxaa ay ku sameysay qaadhaan uruurin ay ka sameysay ganacsatada iyo qoyskeeda, lacago ay bixiyeen shirkadaha Dahabshiil, Telesom iyo iyada oo iibisay dhul ay Hargeysa ku laheyd oo ay iibisay si ay ugu dhamaystirto dhismaha xarunta.

Luul oo la hadlashay Raadiyow Ergo ayaa xustay in muddo afar sano ah oo ay xaruntaasi maamulaysay boqol iyo soddon carruur ah ay guryahoodii ku ku celisay. Waxaa ay la raadsan jirtay waalidiinta marka ay carruurtu u sheegaan in ay rabaan in dib ay ula midoobaan qoyskoodii ay ka soo carareen.

“Markiiba magaalada waxaa la galiyay carruurta waala dhoofinayaa, haayado ayaa qaadanayo oo Xamar ayaa laga dhoofinayaa, caruurta waa lagu shaqeysanayaa, bulshadii oo dhan ayaa si kale loo fahansii caruurta aanu xareynay, lacagtii ayaa halkaas idin la gashay ayaan nala lahaa, wayna nagaga khudbadeeyeen meel kasta, markii dambe qof waliba cagihiisa ku yimid waa laga baxay wixii nalaga aaminsanaa,” ayay tiri Luul oo ah hooyada lix carruur ah.

Dhismaha xarunta waxaa la dhameeyay sannadkii 2009.

Sanadkii 2013 ayay xukuumada Somaliland xabsiga u taxaabtay Luul Xasan Mataan si ay ula wareegto xarunta ay sameysay oo dowladdu rabtay inay gacanta ku hayso. Toddobo iyo toban maalmood oo ay ku xidhnayd xarunta dambi barista Hargeysa kadib waxaa lagaga saxeexay qoyskeeda inay wareejiso xaruntaasi oo ay dowladu la wareegtay.

Maalmahaas waxaa xerada ka soo baxsada boqol iyo konton carruur ah oo darbijiif ah, waxay ku hor mudaharaadeen xarunta dambi baarista.

“Wax la ii sheegay ma jirto ee waxaa la yidhi meeshan dowladda ayaa u baahan, shaqadii dowlada ayaad wadaa ayaa la igu yidhi, ee ka bax howshan, sidii ayaan kaga tagay meeshii aan ku tabcay,” ayay tiri Luul.

Weli waxay ku hamiyaysaa inay carruurtaa wax un u qabato. Hadda waxaa ay waddaa dhismaha xarun loogu talagalay carruurta darbijiifka ah ee magaalada Boorama, sidoo kale waxaa ay ka mid tahay musharaxiinta gobolka Maroodijeex ku tartamaya doorashada wakiillada Somaliland.

“Haddii Alle igu guuleeyo waxaan rajeynayaa inaan shaqadan wax badan aan ugu qabto bulshadii oo aan ku ilaaliyo xuquuqda dadka danyarta ah amma haddii aan waayo arrimaha bini’aadanimada aan ka shaqeeyo oo aan alle ugu sii dhawaado,” ayay balanqaaday Luul oomudooyinkii dambe guddoomiyaha urur maxali ah oo lagu magacaabo SOCWER.

Ururku waxaa uu ka shaqeeyaa taageerida carruurta darbijiifka ah marka ay dhaawacyo la kulmaan, ciid siintooda.

Post your comments

Jawaab ka bixi

Please enter your comment!
Please enter your name here