Dugsi farsamada gacanta lagu barto oo laga furay tuulada Adhi-cadeeye

0
190

(Ergo) – Cabdiraxmaan Maxamed Maxamuud oo ah 28 jir wuxuu ka mid yahay 45 arday oo wax-ka-barta iskuul farsamada gacanta lagu barto.

Ardaydan ayaa dhamaantood ka mid ah dadkii xoolaha ka dhamaadeen ee ku soo barakacay xeryo ku yaal tuulada Adhi-cadeeye oo 30 km dhinaca waqooyi ka xigta magaalada Laascaanood ee xarunta gobolka Sool.

Wuxuu hadda dhiganayey afar bilood, laba bilood ayaa u sii harsan, laakiin isagoon weli qalin jebin ayuu fursado shaqo ku helaa xirfadda uu bartay, isagoona shaqaysta maalmaha khamiista iyo jimcaha.

“Anniga iyo 14 qof oo kale ayaa baranay farsamada dhismaha, maalintaan shaqaysto waxaan soo helaa 12 doolar. Markii hore aan iskuulkan soo galay wax aan aqaanay ma jirin, waxaan ahaa nin baadiya ka soo galay, faa’iidada iyo aqoonta aan ka helay waa mid hadda noloshayda rajo soo gelisay,” ayuu yiri Cabdiraxmaan oo hadda caafiya qoyskiisa oo 250 adhiya iyo 20 neef oo geel ah uga dhinteen abaartii 2017.

Ardayda kale ee farsamooyinka kale hadda ka bartay kuna shaqaynaya iyagoo weli waxbarashadii ku jira waxaa ka mid ah Jaamac Cali oo ah oo barta farsamada korontada. Wuxuuna hadda caawiye u yahay farsamoyaqaan korantada guryaha geliya.

“Waxaan ula shaqeeyaa fuundiga waa in aan tababar gacanta ah helo, si aan isugu filnaado markaan dhamaysto waxbarashada oo aan annigu gaarkay u qabsan karo shaqada” ayuu yiri Jaamac.

Dadka deegaanka Adhicadeeyo oo lacago isku dardaray ayaa waxaa ay hirgeliyeen iskuulkaan shan bilood ka hor, iyadoo difacadii ugu horaysay ay hadda dhiganayso.

Maamulka dugsigaan Maxamed Saleebaan warsame oo ka mid ah guddi loo xirsaaray hirgelinta dugsiga ayaa Raadiyow Ergo u sheegay in  Hirgelinta Iskuulkaan ay ku qaadatay dadka deegaanka muddo ka badan laba sanno.

Qarash gaaraya ilaa 40,000 oo doolar ayaa ku baxday dhismaha iskuulkan. Lacagtaan ayaa guddi 7 xubnood ah oo dadka deegaanka ahi waxa ay ku ururinayeen muddo laba sano.

Maxamed wuxuu sheegay in dhaqaalaha intiisa badan uu ku baxay raadinta macalimiin talo leh iyo qalabka ardayda wax lagu bari lahaa.

Hadda waxaa wax ka dhiga iskuulkan ilaa lix macallin oo labo ka mid ah laga keenay dalka Kenya. Iskuukan waxaa bishii ku baxda lacag gaaraysa 5,400, taa oo loo isticmaalo cunnada, jiifka, qalabka waxbarashada iyo mushaharka macalimiinta.

“Dhallinyarada  waxaa la baraa farsamooyin gacanta sida dhisamaha guryaha, xiriirinta tubooyinka ama biyo gelinta iyo korontada. Waxa kale oo la baraa waxbrashada aas-aasiga ah sida qorista afsoomaaliga iyo xisaabta, waana lacag la’aan,” ayuu yiri Maxamed.

Abdulaahi Cali Aadan wuxuu ka mid yahay macallimiinta iskuulka farsamada gacanta ee Adhi-Cadeeye kaa oo bara ardayda qaybta dhisamaha guryaha.

“Siddeed bilood ayaan ugu talagalnay in ay ku dhamaystaan , laakiin haddaba way ku shaqaystaan oo iyagaa dhaqaale ka samaystaan,” ayuu yiri Cabdulaahi.

Post your comments

Jawaab ka bixi

Please enter your comment!
Please enter your name here