Dhaqaalaha sayladda Burco oo kor u kac sameeyay Caraffada awgeed

0
124

(ERGO) – Ganacsatada yaryar ee ka dhex shaqaysta sayladda xoolaha ee magaalada Burco ayaa muddo sanad ah markii ugu horreysay helaya dhaqaale fiican oo ka soo galay kala iibsiga xoolaha loogu talagalay dabaxa ciida Caraffada .

Xoolaha keeno sayladaha magaalada Burco ayaa aad u kordhay tan iyo markii la la fasaxay xoolaha loo dhoofiyo Sacuudiga inkastoo labadii isbuuc ee la soo dhaafay aanan la dhoofin. Ganacsato xoolaha ka iibsato Sayladda Burco ayaa waxaa ay u sii gudbiyaa dekedda Berbera oo laga sii dhoofiyo.

Waxaa hadda sayladda la keenaa xoolo badan oo ka imaanaya deegaannada Somaliland. Dadka ka faa’ideysanaya fursaddan waxaa ay isugu jiraan kuwa ka shaqeysanaya dallaalka xoolaha, ilaalintooda, u kaxaynta dadka xoolaha iibsada, iyo dumar iyo rag suuqa kuleh maqaayado iyo meherado kale oo ganacsi.

Cosob Cabdi Wayrax waa hooyo haysata toddobo carruur ah sidoo kalena maareysa saddex qoys oo kale kuwaa oo kala jooga gudaha magaalada Burco iyo baadiyaheeda.

Waxaa ay ku dhex iibisaa sayladda caano iyo kimis ay kagadato dadka suuqa imaada.

Cosob waxaa ay sheegtay in hadda aad wax looga iibsado oo ay soo gashay yididiilo kadib markii ay heshay suuq.

“Markii hore suuqa waan iska dhex joognay mar nagala iibsado iyo maraan nagalaba  iibsanba, haddase sifiican ayaa wax nalooga iibsadaa intii adhiga naloo furay. Maalintii waxa iga soo gala 30kun oo shilin Somaliland ah,” ayay tiri Cosob oo hadda ku faraxsan dib u furidda suqii dhoofinta xoolaha.

Ibraahim Cabdullaahi waxaa uu muddo sagaal sano ah ku leeyahay sayladda Burco agteeda maqaayad wax laga cuno. Ibraahim oo in dhawaalaba aanan heli jirin wax suuq ah ayaa sheegay in hadda maqaayadda ka faaiida maalinti $25.

“Halkaan Hudheel (Maqaayad) ayaan ku haystaa, hadda intii suuqu furmay sare ayuu u kacay iibka maqaayaddu, waxaan ku iibiyaa bariis iyo hilibi. Intii Carafadan ka horaysay hudheelkaygu dab yar buu iska ahaa,” ayuu Ibraahim.

Cabdi Cilmi waxaa uu ka mid yahay dullaaliinta ka shaqeysta suuqa xoolaha ee magaalada Burco. Muddadii sanadka ahayd ee suuqa xoolaha ganacsigiisu hooseeyay ayuu sheegay in uu deyn ku maareyn jiray noloshiisa balse hadda uu dhaqaalo fiican helo oo uu iska bixiyo daymihii lagu lahaa.

Post your comments

Jawaab ka bixi

Please enter your comment!
Please enter your name here