Xoolo-dhaqato hore oo la baray sida loo abuurto beeraha dedan

0
203

(ERGO) – Ilaa 40 qoys oo ah xoolo-dhaqato ku cayroobay abaarihii 2016-2017 oo hadda ku nool xero barakac oo ku taalla deegaanka Ballimataan oo Hargeysa 85KM dhinaca koonfureed kaga beegan ayaa bishan Agoosto ka faa’iiday dalagyo uga soo go’ay beeraha dedan (green house) ay muddo laba bilood ka hore ay ku abuureen duleedka xerada.

Dalagyada ay beereen ayaa waxaa ka mid ah saladka, yaanyada, kabashka, khajiga iyo barbarooni.  Beeralaydan ayaa todobaadkan waxaa u soo go’ay yaanyo iyo salad gaaraya ilaa 60 kiilo.

Beertan oo cabirkeedu uu gaaraya 250 mitir oo dhirir ah iyo 150 mitir waxaa dadkan ku caawiyay dhalinyaro ka soo jeeda deegaanka Ballimataan oo ku nool gudaha dalka iyo dalka dibadiisa iyo Hay’ada DRC.

Diiriye Xuseen Jaamac, guddoomiyaha ururka horumarinta barakacayaasha Balliamataan ee Baabuu ayaa sheegay in loogu talogalay in dadka ay noqdaan kuwa isku filan oo ka maarma gargaarrada hay’addaha.

“Beertan waxaan ugu talagalnay dadka ay xoolaha ka dhamaadeen oo halkan mudada sanadaha ah dagannaa, ahmiyada ugu wayn ee aan sidaan u sameenay na waa in dadkaan ay noqdaan dad iskood u istaaga oo nolashooda ku filan tahay,“ ayuu yiri Diiriye.

Biyaha waxaa ay beertu ka heshaa laba baraagood oo biyaha roobku galaan iyo ceel riig ah oo la qoday bishii April ee sanadkan.

Diiriye ayaa xusay in qoysaskani tababar loo bilaabay oo uu wali u socda.

Cali Maxamuud Liibaan oo ku nool xerada barakaca ee Ballimataan kana ka mid ah dadka la siiyay beerta ayaa si maalin ah u waraabiyaa dalagyada.

“Aad ayaan ugu faraxsanahay falashada beerta, waxaan wax lasiisto lahayn xirfada cusub ee aan baranay anaga oo nolasheena danbe ina anfacaysa,“ ayuu yiri Cali oo ku xoola beelay abeertii dalka ku dhufatay 2017.

“Nolasha beer falashada iyo xoola-dhaqasha runtii aad ayay u kala duwan yihiin, beer falashadana hada nolasheena ayay wax weyn ka badalaysaa aniga iyo bahdaan ka mid ahayba,“ ayuu yiri Cali

Muddada labada bilood ah waxaa dadkan beerta la siiyay u socday tababar lagu barayo qaabka beeraha casriga ah loo beero, sida cayayaanka looga dilo, loo waraabiyo iyo habka carrada loo kala rogo.

Daahir Cismaan Cabdilaahi wuxuu ka mid yahay dadka la siiyay beerta waxaa uu halkan yimid sanadkii 2016 kadib markii xoolihiisa abaarta ka leysay.

Lix bilood oo tababarka ah kaddib waxaa uu qorsheesan in uu beertiisa kobciyo.

Faadumo Cabdisalaan Cabdullaahi oo ka mid ah howl-wadeennada Golaha Qaxootiga ee Dermark (DRC) ayaa Raadiyo Ergo u sheegtay in caawimaad dhaqaale-wadaag ah ay hay’addooda iyo urur ay leeyihiin qurbajoogta iska kaashadeen si loo caawiyo xoolo-dhaqatada ay abaartu saamaysay si ay xirfad uga dhigtaan beero-falashada. Waxay xustay in ay jiri doonaan afar beer oo kale oo dadkaas loo sameyn doono.

Mashruucan ayaa sida ay tilmaantay dadkan uga wada shaqeyn doonaan qaab iskaashato beeraley ah si u kobciyaan dhaqaaalahooda iyo faa’iidada ka soo galeysa beerta. Waxa ka soo go’a beerta ayaa boqolkiiba hal waxay qoysaskan soo barakacay ku taageeri doonaan dadka deegaanka ee saboolka ah.

 

 

Post your comments

Jawaab ka bixi

Please enter your comment!
Please enter your name here