Sanaag: Xoolo-dhaqato barakac ah oo aan haysan cad iyo caano

0
174

(ERGO) – Barnaamijka xeryaha ayaa todobaadkan laga soo diyaariyay mid ka mid xeryaha ku yalla gobolka Sanaag. Weriyaha Raadiyow Ergo ayaa warbixintan ku eegaya dad reer miyi hore ahaa oo ku soo barakacay gobolka. Dadkan ayaa hadda ku nool xero u dhaw magaalada Xingalool. Dadkan ma haystaan wax gargaar ama caawinaad ah oo aanan ka ahayn taakulayn ay ka helaan qaraabadooda. 

Shamis Caydiid Warsame oo saddex sano ka hor ay xooleheedii abaaro ka dhameeyeen ayaa ilaa hadda waxaa ay wajahaysaa caqabado dhanka nolosha ah.

Iyada iyo 74 qoys oo kale oo ah reer miyiga ka soo barakacay deegaanno ku yaalla bariga gobolka Sanaag waxaa ay ku nool yihiin xero barakac oo ku yaalla deegaanka Sibbaaye.

Dadka ayaa markii hore u yimaaday halkan in ka helaan biyo balse hadda ay u noqotay deegaan ay ku noolaadaan.

Shamis waxaa ay ka mid ahayd hantiilayaasa reer guuraaga ah in aysan abaartu ka laayn xoolaheeda oo gaarayay 300 oo neef oo adhi ah iyo 30 geel ah balse hadda ay uga soo hareen 12 neef oo ari ah  iyo laba halaad oo geel ah, kuwaas oo ay u gaysay qoys oo ay qaraabo yihiin.

Waxaa ay rajaynaysay in ay tuulada ka hesho adeegyada asaasiga ah ee nolosha balse waxba kama aysan helin.

“Meeshan wax shaqo abuur ah ma laha, dugsi ma leh, dhagax ma dhisan karno, waxaan u baahnnahay waxtar; biyo iyo caafimaad, meeshan biyaheedu waa biyo adag haddii aan helno booyad qof xigta ah oo nagu qora deyn ayaan uga qaadanaa, biyaha adag ee halkan lama cabbi karo oo caruurta ayaa nagaga shubanta,”. ayay tiri Shamis oo haysata 7 caruur ah.

Qoyska Shamis waxaa ay hadda ku tiirsan yihiin hadba caawimaadda uga timaadda dad ehelkeeda ah oo isla gobolka ku sugan.

Deegaanka hal dugsi oo keliya oo hoose ayaa ku yaal, kaasi oo ay dhigtaan ilaa 40 arday, iyada oo ardaygiiba laga qaado afar dollar.

Shamis waxaa ay tilmaantay in ay markii ay deegaanka soo degeen ay dugsiga u dirtay afar cunug oo ay dhashay balse dhowr jeer oo loo soo diray lacagta Iskuul in ay awoodi wayday oo ay carruurteeda ka joojisay aadista iskuulka.

Inkasta oo barakacayaashan ay ku nool yihiin tuulo miyi ku taal oo aysan suurogal ahayn in ay fursado shaqo abuur helaan haddana waxaa jira qaar meherado shaah nolosha qoyskooda ku maareeya, sida Faadumo Gaanni oo qoyskeeda uu ka kooban yahay 8 qof.

Faadumo afar ka mid ah carruurteeda ayaa dugsiga deegaanka dhigta. Nolosha qoysk, lacagta waxbarashada caruurteeda iyo howlaha kale ee qoyskaba waxaa ay ku maareysaa dhaqaalaha ka soo gala mehradan.

Qaar ka mid ah dadkan ayaa naawilaya in ay mar un dib ugu laabtaan miyigii iyo noloshii ay yaqaaneen haddii ay helaan taakulayn, sida uu Ergo u sheegay Cabdulqaadir Faarax Maxamuud oo ka mid ah dadkaas.

“Miyigii xoolo aan ugu laabto ma haysto dhulku waa naq laakiin, maxaa noo daaqayaba, shaqadii aan naqaanay ee xoolaha ayaan jeclaan lahaa,” ayuu yiri Cabdulqaadir.

14 neef oo ari ah ayaa Cabdulqaadir uga soo doogtay 200 ari ah oo uu lahaa.

Post your comments

Jawaab ka bixi

Please enter your comment!
Please enter your name here