Umuliso soddon sano ku shaqeynaysay mushahar la’aan

0
438

(ERGO) – Saynab Cabdi Warsame waxaa ay si mutadawacnimo ah magaalada Xingalol ee gobolka Sanaag uga shaqeysaa gargaarka hooyada iyo dhalaanka muddo soddon sano, iyadoo isxilqaanka caafimaad bilowday 1988-kii kaddib markii ay ka baratay machad caafimaad oo ku yaallay degmada Buraan ee isla gobolka Sanaag.

Dadka caafimaadka yaqaan oo yaraa iyo carruurta iyo haweenka oo dhibaato kala kulmi jiray dhakhaatiir-yaraanta ayaa Saynab ku kallifay barashada caafimaadka sida ay Raadiyow Ergo u sheegtay.

“Hooyada iyo carruurta siiba dadka nugul, kuwa laga tirada badan yahay, barakacayaasha dadkaas jilicsan ayaan u adeegaa, haddana si bilaash ah ayaan ugu shaqeeyaa xaruntana si mutadawacnimo ayaan uga howlgalna,” ayay tiri Saynab.

Saynab Cabdi oo ah hooyo saddex caruur ah haysto ayaa hadda ahmadaxa xarunta hooyada iyo dhalaanka ee Xingalool oo ay ka howlgalaan 11 shaqaalo caafimaad oo hadda ku shaqeeyo si mutadawacnimo ah.

“Haddii aan la kulmo hooyo dhiban xarunta ayaan geeyaa halkaas oo daryeel laga heli karo, beryihii hore baabuur ma jirin hooyo dhiig baxaysa ayaad gaadhi u waayeysaa, waxyaabahaas ayaan xasuustaa haddase waxkastaa fudeyd. Markasta oo aan jaanis helo laba saacid baan aadaa dadka dhibban waan dhex maraa, xarumaha caafimaadka taga ayaan dhahaa, wixii aan qaban karo waan qabtaa wixii kalena xarunta ayaan u diraa,” ayay tiri Saynab oo lix saacadood oo ay xarunta ka howlgasho kaddib kormeer ku dhexmarta danyarta aan gaadhi karin xarumaha caafimaadka.

Saynab ayaa tilmaamtay in ay aasaastay urur ay ku mideysan yihiin qaar ka mid ah haweenka deegaanka si ay wacyigelin ugu sameeyaan haweenka kale.

Inkastoo aysan xasuusan tirada saxda ah ee haweenka ay u umulisay si mutadawacnnimo, haddana waxaa jira gabdho ay hooyadood ka umulisay markii ay dhalanayeen haddana ay iyaga ka umulisay waliba si mutadawacnimo ah.

“Howl muhiima ayay haysaa eddo Saynab, waqti dheer ayayna haysay oo dadka hadda aysan qaban karin, dadka hadda lacag uun bay doonaan bilaashba ma jecla, waan u abaal gudi, hooyaday ayay iga qabatay (iga dhalisay), ilmahaygii curadkana way qabatay abaal weyn ayay igu leedahay mana ilaawayo,” ayay tiri Aaamina Axmed Cabdirisaaq oo ah jiilkii Saynab hooyadood ka umulisay haddana mar kale ayaga la keenay xarunta caafimaad si ay ugu umulaan.

Aamina hadda waa ardayad barata cilmiga caafimaadka waxayna rajeynaysaa in ay Saynab oo kale ay noqoto islamarkaana uga dayato in ay gargaarto kuwa u baahan adeegyada caafimaad.

Post your comments

Jawaab ka bixi

Please enter your comment!
Please enter your name here