36 carruur ah oo nafaqo darro loo seexshay isbitaalka Hargeysa

0
Qaar ka mid ah carruurta la keenay isbitaalka guud magaalada Hargeysa/Ilyaas Cabdi/Ergo

(ERGO) – In badan 30 carruur ah oo ay haysato nafaqa daro darani ayaa la soo gaarsiiyay Isbitaalka guud ee magaalada Hargeysa tan iyo billowgii usbuucaan.

Carruurta hadda jiifta isbitaalka ayaa waxaana laga kala keenay xeryaha barakaca ee gudaha Hargeysa iyo deeganada miyiga.

Xaafadaha barakacayaasha ee Daami, State House, Cakaara, Naasahablood A iyo B iyo Sheedaha laga keenay carruurtan inta badan.

Dr Cabdiraxmaan Cabdilaahi Cismaan madaxa qeybta nafaqeynta cisbitaalka guud ee magaalada Hargeysa ayaa Raadiyow Ergo u sheegay  in ilaa 36 carruur ay haysato nafaqa darro darani.

Dr Cabdiraxmaan waxaa uu sheegay in badanka caruurta ay ku daweeyaan qeybta nafaqeynta ee isbitaalka in aysan helin caanaha naaska ee hooyada taasina ay keentay in xilli kasta ay nuglaadaan in nafaqo daro ku soo noqnoqota.

“Maalintii ugu yaraan siddeed qof ayaa la keenaa, waxaa keenay (nafaqa daradani) xilligan oo roobabkii lagu jiro iyo abaaraha jira, sidoo kale nafaqo darada inta badan carruurta aan daweynayno waxaa la siin caano iyo irbado,” ayuu yiri Dr Cabdiraxmaan.

Caruurta caanaha la siinayo waa bilaash oo waxaa cisbitaalka ugu deeqday haayada qaramada midoobay u qaabilsan ilaalinta caruurta ee UNICEF.

Maalintii siddeed goor ayaa caanaha la siiyaa caruurta nafaqo daro hayso ee ku qeybta nafaqeynta caruurta ee Isbitaalka Hargeysa.

Cibaado Liibaan Guuleed wiil iyo gabadh mataano ah oo lix bilood jira ayay cisbitaalka ku haysaa maalintii lixaad. Waxay Raadiyow Ergo u sheegtay in matag badan ay yeesheen kaddibna ay waxba u cuni waayeen, sidaana ay ku keentay Isbvitaalka.

Cibaado waxaa ay ka timid xerada barakaca ee Naasahablood B, hadda waxaa ay sheegtay in ay ka soo raynayso xaaladda labada carruur ah oo sanka ka qaadanaya caanaha lagu soo celiyo nafaqada carruurta.

“Shubankii iyo matagii way joojiyeen, siddii hore way dhaammaan oo muddada aan ku jiray, waxaad moodaa in ay sidii hore ka fiican yihiin,” ayay tiri Cibaado oo ah hooyo haysato sagaal carruur ah.

Nolosheedu ku tiirsan tahay wixii ay ka soo hesho xaafadaha ay dharka u dhaqdo, balse hadda waxaa ay kaga timid caruurta intoodii kale xaafad la jaarka ah. Mudada ay ka soo maqnayd waxaa ay sheegtay in aan ay war ka ahayn xaallada ay ku sugan yihiin,

“Caruurta anigaa u hooyo iyo aabbe ah, meel kale oo wax ka soo galaan may jirin, boqol kun ayaan soo heli jiray oo aan siin jiray, inta aan halkan joogay wax ay ku noolyihiin alle ayaa og,” ayay tiri Cibaado oo ka walwalsan xaalka carruurta ee ay xaadfada uga timid.

Aamina Axmed Sugule, waxay ka timid Carmale oo magaalada Ceerigaabo 45KM ka xigta dhinaca beri, qeybtan nafaqeynta ee isbitaalka weyn waxaa ay keentay gabadh yar oo afar jir ah shan maalmood ka hor.

Waxay Raadiyow Ergo u sheegtay in gacmaha ay ku siday markii ay isbitaalka keenaysay gabadheeda balse hadda ay roontahay.

Isbitaalka Ceerigaabo ayay sheegtay in uu ku soo wareejiyay mid ka guud ee magaalada Hargeysa.

Si ay ilmaheeda uga daweyso nafaqo daro waxaa ay halkan u soo socotay habeen iyo maalin ay safar gaadhi ku soo jirtay.

“Marka ay laba habeen jirtay ayuu matagu ku bilaabmay laakiin maanta way wacan tahay, waa markii saddexaad ee aan yimaado Isbitaalada, xaalladdeedu balaq ayay ahayd markaan keenay laakiin hadda waataas fadhida,” ayay tiri Aamina oo ah hooyada sagaal caruur ah oo markii u horeysay nafaqo daro kaga dhacday gabadheeda ugu yar.

Lacagta ay ku soo raacday gaariga waxaa ka soo bixiyay odeygeeda oo ka shaqeeya Carmala.

Markii uu  buuxsamay waadhka caruurta lagu daweynayo waxaa dibada bukaanada qaar ay jiifaan taandhooyin ku yaala daarada hore ee dhismaha isbitaalka.

Post your comments

Jawaab ka bixi

Please enter your comment!
Please enter your name here