Somaliland: Biyo dhaamin laga sameeyay tuulooyin aan roobka guga helin

0
149

(ERGO) – Tuulooyinka Ulasan iyo Warcimraan oo ka tirsan Waadaa-magoo ee gobolka Saraar ee Somaliland ayaa dadka ku nool loo sameynayaa biyo dhaamin.

Biyo dhaamintan ayaa ah mid socotay tan iyo jiilaalkii hore, iyadoo roobabkii gu’ga aysan ka da’in deegaannadaas.

Todobaadkiiba saddex booyadood oo biyo ah ayaa labada tuulo waxaa geeya golaha deegaanka ee degmada Caynabo, sida uu Raadiyow Ergo u sheegay Axmed Maxamed Xaashi  oo ah duqa magaaladaas.

Axmed ayaa sheegay in tuulada ay ku nool yihiin afar boqol oo qoys, una badan dad cayr ah oo ka guuri kari waayey. Qoysaska waxaa biyaha loogu shubaa baraago u qodan oo biyaha roobku u gali jireen.

“Deegaanada berkado ayaa biyaha ay ka heli jireen, hadda biyahan waxaan uga keennaa meelihii roobku ka da’ay oo biyuhu ku jiraan, 30KM ayay jiraan meelaha aan uga soo dhaaminayno,” ayuu yiri Axmed.

Maayirka degmada Caynabo ayaa sheegay in dhaqaalaha ay biyaha ugu dhaaminayaan tuulooyinka ay ka soo ururiyeen ganacsatada gobolka oo ay kala shireen siddii biyo loo gaadhsiin lahaa deegaanada aanu roobka di’in ee biyo la’aantu saameysay.

Axmed waxaa uu sheegay in aanay jirin awood kale oo ay ku caawiyaan dadkaasi dhibaataysan.

Maxamed Faarax Sugaal oo qoyskiisu ku nool yihiin tuulada Ulasanka ayaa Raadiyow Ergo u sheegay in ay maalmaha qaar wax ay waayaan waxay raashiin ku karsadaan, biyaha loo keenana aysan ku filnayn. Wuxuu xusay in maamulka degmada ay qaylo dhaan ugu tageen markii ay waayeen roobka gu’ga oo deegaanada kale ka da’ay.

Maxamed qoyskiisa waxaa uu ku tiirsanaa lix bilood ee u dambeeyay biyo dhaaminta loo sameynayay.

“Aniga iyo caruurtuba waan joognaa, walaahi waa dhibaato, wax aan ku guurno  ma hayo, biyaha naloo keenaa waa wax 20 litir aan ka badnayn, degdeg ayeyna u dhamaanayaan oo dadkii oo haraadan ma haysan karto oo waala wada cabayaa,” ayuu yiri Maxamed oo xoolihii uu qoyskiisa ku tiirsanaa kaga leeday abaartii ku dhufatay sanadkii 2018.

Waxaa ay qoyskiisu ku noolyihiin 60$ oo walaalkii oo Burco degan si bile ah u siiyo. Lacagtaasi waxaa ay siistaan bur, bariis iyo sonkor.

Farax Maxamed Cabdilaahi oo todobaadkiiba hal maalin iyada iyo saddex caruur ah oo ay dhashay biyo dhaaminta ka faa’ideystay, waxay sheegtay in deegaanka ay hadda joogto u timid si biyo u hesho.

Bishii December ee sanadkii hore ayay kasoo guurtay meel baadiye oo qiyaastii 45KM u jira tuullada ay hadda ku nooshahay.

Caruurteeda waxaa ay cuno u karisaa laba wakhti si ay u yareyso biyaha ku baxaya qoyska oo aanay ubadku u waayin biyo ay ku noolaadaan.

“Xoolaha yare e noo haray cid kaama iibsanayso oo waa caato, ilaahay ayaan sugaynaa iyo qolada wax noo shubta, ciyaalkii cunaha ayuunbaan u qoynaynaa hadda.”ayay tidhi Farax.

Post your comments

Jawaab ka bixi

Please enter your comment!
Please enter your name here