Imtixaanka dugsiyada sarre iyo dhexe oo ka bilowday Puntland

0
362

Imtixaanka dugsiyada sarre iyo dhexe ayaa si rasmi ah uga bilowday dhamaan deegaanada Puntland ka dib markii uu maanta daah furay Madaxweynaha Puntland Siciid Cabdullahi Deni.

Wasaaradda Waxbarashada iyo Tacliinta sare ee dowlad goboleedka Puntland ayaa goor hore shaacisay in imtixaanaadka kama dambaysta ah ee fasalka afraad ee dugsiga sarre iyo fasalka siddeedaad ee dugsiga dhexe ay gaareen dhamaan deegaanada loo qorsheeyay in lagu galo. Waa imtixaan midaysan oo ay iskuullada Puntland oo dhan galaan kaas oo ay Wasaaraddu soo wadday sagaalkii sano ee u la soo dhaafay.

“Waxaa maanta imtixaanka u fariisanaysa ku dhowaad 16,000 kun oo arday, wuxuuna ka dhacayaa boqol iyo lix xaruumood oo lixdan iyo afar ka mid ah ay yihiin dugsiga dhexe ama fasalka siddeedaad, afartan iyo labana ay yihiin fasalka afraad ee dugsiga sarre, dhammaan deegaannada Puntland oo dhan imtixaankaas waa uu taabanayaa”,  ayuu yiri Agaasimaha Imtixaanaadka ee wasaaradda waxbarashada Puntland Axmed Saahid Warsame.

Inta badan ardayda dugsiyada sarre ee deegaannada ayaa badankood imtixaanka ku gelaya goobo aan ahayn iskuuladoodii, dugsiyada dhexe qudhooda ayaa meelaha qaar sidaas ay ka jirtaa waxaana arrintaas ay badanaa wasaaraddu u samaysaa in ay isku misho ardayda iskuulada kala duwan.

Roobab xoog leh oo da’ay asbuucii la soo dhaafay ayaa saameeyay isku socodka deegaanada qaar, waxaana laga cabsi qabay in saamayn ay ku yeelato gaarsiinta deeganada qaarkood imtixaanka sida uu Raadiyo Ergo u sheegay Agaasimaha Imtixaanaadka Wasaaradda.

“Ilaa hadda wax caqabad ah ma hayno, waxaan ka baqaynay roobabkii gu’ga ee da’ayay isbuucii la soo dhaafay oo togaga jaray, laamiyana gooyay. Wasaaradda waxbarashadu iyadoo kaalmaysanaysa Wasaaradaha Arimaha Gudaha iyo Amniga waa la dhaafiyay imtixaanka toggaagaas fatahayay”.

Ammaanka imtixaanka ayaa aad looga taxadaraa inta uu socdo, Wasaaradda arrimaha gudaha Puntland ayaa khamiistii ku amartay gudoomiyaasha gobolada iyo kuwa degmooyinka imtixaanku ka dhacayo in ay si dhow ula shaqeeyaan Wasaaradda Waxbarashada si habsmi u socodka iyo ammaanka imtixaanka loo xaqiijiyo.

Wasaaradda Waxbarashada ayaa sheegtay in ciidamo xoog leh ay ka qayb-qaadanayaan illaalinta imtixaanka ee sannadka., Sidoo kale tababaro ku aadan habka qaadista iyo illaalinta imtixaanka ah la siiyay macalimiinta iyo kormeerayaasha, Culimada diinta ayaa ka qayb qaatay tababaradaas oo baraarujin ku aadan ammaanada siiyay macalimiinta iyo kormeerayaasha.

Imtixaankan ayaa ku soo beegmaya xili ay Dowladda Federaalka ah ee Soomaaliya hakisay imtixaankii guud ee ka socday Koonfurta iyo Bartamaha dalka muddo saddex maalmood ah, kadib markii si hoose loo dusiyay maadooyinka la galay oo dhan.

Dowladda Soomaaliya ayaa sheegtay in ay joojin doonto internet-ka marka uu imtixaanku dib u bilawdo 27k bishan, laakiin imtixaanka ka bilwday deeganada Puntland wax saamayn ah kuma yeelan adeegsiga Internetka.

halkan ka dhagayso Warbixinta oo maqal ah.

Post your comments

Jawaab ka bixi

Please enter your comment!
Please enter your name here