Puntland: Carruur ku dhintay roobab ka da’ay gobolka Barri

0
90
Sawir/Keyd/Ergo

(ERGO) – Roobab socday in ka badan 8 saacadood, habeenimadii arbacada aheyd ayaa ka da’ay qeybo badan oo ka mid ah Gobolka bari ee Puntland.

Waxaa daadadkaas ka dhashay qasaaro isugu jira naf iyo maal, sida ay xaqiijiyeen saraakiil ka tirsan Puntland iyo dadka deegaanadaas.

Ismaaciil Cabdi Ciise oo ahaa Aabbaha qoys ka kooban 4 carruur ah iyo hooyadood ayaa roobabkii ka soo rogmoday togga Qayaadsame ee u dhaxeeya deegaanada Laasa-Dawaco iyo Degmada Jurrile ay dhibaato u gaysteen.

Habeenimadii Arbacadu soo galaysay ee 15-kii bishan, ayuu Ismaaciil ku waayay 3 ka mid ah caruurtiisa roobkaas.

Isaga iyo dhamaan qoyskiisa oo degan deegaanka Gurane oo qiyaastii 25 KM u jira degmada Waaciye ayaa sidoo kale daadku kala tagay ari gaaraya 147 neef.

Ismaaciil ayaa sheegay in hadda 28 neef oo ari ah, iyo ratti ay u hareen.

“14-kii bishan ayaa roobku nagu soo curtay hal saac oo fiidnimo, laakiin shanta saac (11ka fiidnimo) ayuu nagu xoogsaday roobkii. Tog aan ag daganeyn ayaa biyo keenay, waxaan is laheyn dhinac ayay idinka marayaan, laakiin goor ay saacadu aheyd labadii ayuu roobku mar labaad xoogeystay, Togana jihada waqooyi bari ayaan anagu ka saarnayn, markii danbe ayay nagu soo dhaceen biyihii, waxeyna nagala tageen sadex caruur ah iyo aragii, waana iska farsamo Ilaah,” ayuu yiri.

Sadexda caruurta ah ee daadku la tageen ayaa da’doodu u dhaxeysay 2 sano ilaa lix sano jir.

“Biyuhu anagoo dhan waa nawada qaadeen, caruurta mid na waan xambaaray mid ka kalena gacanta ayaan haayay, caruurtu afar bay ahaayeen, Midna Hooyada ayaa xambaarsaneyd midna iyada gacanta haysay, marka waa cararnay markii biyo labada dhinac naga mareen, dhinicii aan is niri u carara ayaan toosh ku ifiyay mise waa Tog biyo marayaan,” ayuu yiri Ismaaciil oo ka sheekaynaaya wixi dhacay habeenkaas.

Maamulka Degmada Waaciye ee  ayaa gurmad u sameeyay qoyskaasi ku ceyroobay roobka iyo daadadka ka dhashay.

Waxaana deegaankii ay ku noolaayeen ugu tagay masuuliyiinta degmadaasi, si ay ugu soo ka xeeyaan dhinaca magaalada oo loogu aaso meydka caruurta.

Isxaaq Axmed Xasan oo ah guddoomiyaha gegmada Waaciye ayaa Idaacadda Ergo u xaqiijiyay in qasaaro baaxad weyn ay ka dhasheen roobabkaasi.

“Roobab fiican ayaa da’ay, runtii dhibaatooyin yar yarna waa dhaceen, meel degmada Waaciye hoostagta tuulada qiyaadsame, toggeeda ayaa dhowr reer biyuhu kula tageen, laakiin dad badan ayaa xoolihii ka dhamaadaan, waxaase ugu darnaa hal qoys oo sadex caruur ah iyo xoolihiiba ay daadadku kala tageen,” ayuu yiri Isxaaq.

Ku dhawaad 10 qoys oo kale oo iyaguna ku waayay daadadkaasi xoolo fara badan.

 

Post your comments

Jawaab ka bixi

Please enter your comment!
Please enter your name here