Dumar ku ganacsan jiray hareeraha jidadka oo loo dhisay suuq cusub

0
247

(ERGO) – Boqol haween ganacsatada yaryar oo ku ganacsan jiray hareeraha waddooyinka deeganada Xarfo iyo Dan-garanyo ayaa lagu wareejiyey goobo ganacsi.

Haweenkan oo markii hore ahaa kuwa ku ganacsan jiray hareeraha wadada ayaa lagu wareejiyey suuq ka samaysan alwaax iyo jiingado la isku dhisay kuwaas oo har fiican iyo meel ay ku nastaan kuna ganacsadaan leh.

Labada suuq oo laga kala  hirgaliyey deegaanka Xarfo oo 70KM u jira magalaada Gaalkacyo ee xarunta gobolka Mudug iyo deegaanka Dan-goranyo oo 110Km u jirto caasimada Puntland ee Garowe ayaa waxaa ka faa’ideeystay 60 haween oo kusugan Dan-goranyo iyo 40 kudhaqan degmada Xarfo.

Ganacsadataan ayaa dhib badan kuqabay inta ay kuganacsan jireen hareeraha jidadka iyagoo dhibaatooyin joogta ah kala kulmi jiray mehrada ay hor fadhiisan jireen .

Xamdi Cabdirisaaq Axmed oo deggan degmada Xarfo oo ka mid ah haweenka la siiyey goob ay ku ganacsadaan ayaa sheegtay in hadda ay heshay meel fiican oo ay ku ganacsato aysan hadda wixi ka dambeeya ka walwali doonin meel ay ku iibsato mehradeeda , iyadoo xustay in awal ay aheyd garab ku guur  maaddaama maalinba meel ay ku ganacsani jirtay.

“Waxaan gadaa hilibka, mehradii aan horfadhiistaba waxay i dhihi jireen  naga guur oo dhiigaada nala dhaaf, lakiin alxamdulillaah hadda meel laba mitir ah oo aan leeyahay baan heystaan,’’ sidaasi waxaa tiri Xamdi oo ah hooyada sagaal carruur ah.

Ganacsatdaan ayaa hadda sheegay in isbeddel weyn ay kadareemin mehradahooda inta la hirgaliyey labadani suuq , iyagoo tibaaxay in awal hore wax badan  ka sameeni jirin.

”Awal waxaan heli jiray 10,000Sosh maalintii balse hadda waxaan helaa 50,000Sosh sida aan suuqaan ugu soo guuray. Dadka deeganka oo idil inta ayey u suuq yimaadaan,” ayay tiri Xamdi.

Sido kale dadka mashruucani ka faa’iiday waxaa kamid ah Haween markii hore ku gancsani mehrado kira ah oo markii dambe ku adkaatay in ay bixiyaan lacagta ah bil walba.

Haweenkaasi waxaa kamid ah Idil Ciise oo goob ay ku ganacsan jirtay ay iyada iyo haweenay  kale bixin jireen $60, taasoo mararka qaar oo ay awoodi waayaan kirada laga xiran jiray goobta ay ku ganacsadaan.

”kirada dhib badan kuqabnay lakiin hadda lacagta kirada kubixin jiray dana kale kuqabsan karaa,’’ sidaasi waxaa tiri Idil Ciise oo joogta degganka Dangoronyo.

Suuqyadaan oo hirgalintooda ay ku baxday lacag gaareysa $37,000 ayaa waxaa dhisay Ururka Horumarinta ee Samo oo maxalli ah, kaas oo kaashanayay hay’adda Diakonia ee fadhigeeda yahay dalka Sweden, taas oo iyadana ka shaqeysa barnaamijiyada horumarinta.

Warbaahinta Ergo ayaa xirriir la sameesay hay’adda Dikonia si wax badan uga ogaato mashruucani balse hay’adda ayaa kasoo jawaabin qoraallada Ergo.

Abdulkadir Mohamed oo ah madaxa Hay’adda mashruucaan fulisay ee Samo ayaa sheegay in haweenka la guddoonsiiyay goobaha ganacsi lagu soo xushay sida ay kula darnaayeen dhinacyada dhaqaalaha iyo dayac ka haystay suuq la’aanta.

Mashruucaan ayay hay’adda uga gol leedahay in kor loo qaado ganacsiga haweenka danyarta ah isagoo sido kale la filaayo in uu kor u qaado dhaqliga mammulada deegganadsi oo ay canshuur ka helaan.

Labada suuq oo ah kuwii ugu horeeyey ay yeeshaan labada deegaan ayaa shacabka degmooyinka Xarfo iyo Dangoronyo u fududeeyay in ay helaan meelo ay u suuq tagaan.

Post your comments

Jawaab ka bixi

Please enter your comment!
Please enter your name here