Baydhabo: Barakacayaal iibsaday dhul ay milkiyaddiisa yeeshaan

0
69
Barakacayaasha Baydhabo oo la siiyay warqadaha lahaanshaha dhulka ay iibsadeen/Xusni/Ergo

(ERGO) – Raxma Maxamed Ibraahim oo labo sano barakac ku ah magaalada Baydhabo waa markii ugu horreysay ee aysan welwel ka qabin in laga raro halka ay deggan tahay oo ah kaam lagu barakacay oo la yiraahdo Tawakal 2 oo ku yaalla magaalada Baydhabo.

Lix mitir oo uu uga dhisan yahay aqal yar oo baco, ulo, maryo iyo kartoomo la isku dhejiyay ah ayay kula hoyataa carruurteeda oo lix ah. Si ay u hesho milkiyadda dhulkaan waxay ku qaadatay inay dhismeyaasha ka shaqeyso afar bilood oo aan nasasho lahayn.

Lacagta ay ka soo hesho dhismeyaasha oo maalinba si ahayd ayay ku dedaashay inay qeyb ahaan aruuriso, si ay u bixiso $100 oo ahayd lacagta ku soo aadday si dhulka ay u hesho.

Qoys kasta oo ku nool xerada ay deggan tahay ayaa bixinayay lacagtaas, waxayna heleen dhul isku cabbir ah.

“Afar bilood ma nasanin, waxaan xil iska saaray sidii aan ku heli lahaa dhul aan leeyahay,” ayay tiri Raxma.

Waxay Raadiyo Ergo u sheegtay shan jeer laga raray kaamam ay barakac ku ahayd, taas oo ku kalliftay in habeenno ay bannaan ku hoydaan iyada iyo carruurteeda, laakiin hadda welwelkaas meesha wuu ka baxay.

Hadda waxa keliya ee ay rajeynayso ayaa ah sidii ay ku dhisan lahayd guri ka wanaagsan aqalka ay hadda ku jiraan, waxayse qaadan doontaa muddo dheer haddii aysan helin cid ka caawisa sida ay tilmaantay.

Raxma oo carruurteeda keligeed korsata maaddaama ay kala tageen aabbahood waxay sidoo kale maareysaa nolosha qoyskeeda, maalintina waxay dabka shitaan hal waqti.

Xerada ay ku nooshahay waxaa ku deggan 157 qoys oo midkiba laga qaaday $100, lacagtaas oo wadar ahaan dhan $15,700, waxay ku iibsadeen dhulka ay hadda deggan yihiin oo ah xerada lagu barakacay ee Tawakal 2, oo cabbirkeedu yahay 300, oo mitir isku wareeg ah.

Qoysaska dhulka iibsaday waxay toddobaadkii hore heleen warqadaha lahaanshaha dhulka oo ay ka caawiyeen maamulka degmada Baydhabo iyo hay’adda guddiga qaxootiga Norway (NRC).

Cismaan Sheekh Maxamed oo ah hor joogaha kaamka Tawakal labo, ayaa Raadiyo Ergo u sheegay in muddo afar bilood ah dadka xerada deggan laga aruurinayay lacagta. Lacagta waxaa lagu aruurinayay goob ganacsi oo uu leeyahay nin ka mid ah dadka deegaanka.

Guddi ka kooban toban qof oo laga soo xulay kaamka ayaa ka shaqeynayay lacag aruurinta.

“Waa dad ay dhibaatadu wada taabatay. Bay iyo Bakool ayay ka yimaadeen, meel ay ku noqdaanna malaha oo waxba kama dambeeyaan,” ayuu yiri Cismaan.

Dhammaan qoysaska xerada deggan waxay isku mid ka yihiin inaysan lahayn wax qorshe ah oo ay dib ugu laabtaan deegaannadii ay abaarta uga soo barakaceen sanadihii 2016 iyo 2017. Waxay isugu jiraan kuwo xoolo-dhaqato ahaa oo xoolihi ka dhammaadeen iyo beeraley soo iibsaday beerahoodii markii ay abaarti dhacday.

Boqollaal qoys oo ku nool 15 kaam oo uu ka mid tahay kaamka Tawakal labo iyo Caanoole ayaa iibsaday dhulalka ay barakaca ku yihiin, kuwaas oo aan hadda ka welwel qabin inay ku ledaan dhul laga rari karo xilli kasta.

Post your comments

Jawaab ka bixi

Please enter your comment!
Please enter your name here