Reer miyi billaabay in ay dib u dhaqdaan xoolo muddo ka badan labo sano kaddib

0
266
keddka Ergo

Inka badan 60 qoys, oo ku xoolo beelay abaar labo sano ka hor ka dhacday gobolka Mudug ayaa billaabay in ay dib ugu noqdeen miyiga, oo ay ay xoolo dhaqdaan kaddib markii ay ka faa’iideysteen xoolo qeybin ay bartamihii bishan u sameysay hay’adda Cesvi oo ah hay’ad samafal ah oo fadhigeedu yahay dalka Talyaaniga.

Qoysaska helay deeqdan, ayaa tan iyo markii xoolahoodi ay abaaraha ku le’deen waxay barakac ku ahaayeen xeryo ku yaalla deegaannada Wisil iyo Ceel-guula ee koonfurta gobolka Mudug ah.

Sida mas’uuliyiinta maamulka labadan deegaan ay u sheegeen Raadiyo Ergo, waxaa xoolo-dhaqatadan qoyskiiba la siiyey shan neef oo ari ah lagu xushay in ay diyaar u ahaayeen, in haddii ay xoolo helaan ay dib ugu laabtaan deegaannadii ay markii hore ka soo barakaceen oo roobka deyrta si fiican uu uga da’ay.

Si gaar ah dadka ka faa’iideystan barnaamijkan waxay u badan yihiin dadka nugul, sida haweenka keligood korsada carruurta.

Waxaa kamid ah haweenkaas Istaahil Cilmi Kheyre, oo ah hooyada toban carruur ah. November 17 ayaa la siiyey shan neef oo ari ah oo labo ka tirsan ay irmaan yihiin, kuwaasoo caanaha ay ka hesha ay hadda carruurteeda shaaha ugu cadeyso, raashinkana ugu darto.

Muddo labo sano ayey  qoyskeedu ku noolaayeen xero barakac ah oo ku taalla Wisil, kaddib markii 200 oo neef oo ari oo qoysku lahaa ay ku waayeen abaar miyiga Wisil ka dhacday.  Lixdii neef oo abaarta ka badbaaday oo ay xerada la soo gashay ayaa calaf la’aan u le’day March 2016. Intii ay xerada joogtay waxayna noloshooda ku tiirsaneyd kaalmo raashin ah oo ay hay’adaha ka bixiyaan xerada barakaca.

Hadda oo ay miyiga Wisil ay dib ugu laabatay, ayaa Istaahil waxay rajeyneysaa in xoolaha la siiyey ay tahay billowga dib u soo noqoshada nolosheedii xoolo-dhaqatonimo. Waxay qabtaa rajo ah arigan uu u tarmi doono.

“Xoolaha la i siiyay aad ayey ii anfacayaan, sababtoo ah markii hore qof ceyr ah ayaan ahaa, haddana si kastoo ay u yar yihiin waxaan ahay qof xoolo shinsaneysa. Halkii aan ka soo barakacay meel ku dhow ayaan xoolaha la jooga oo roob fiican uu ka da’ay nacfi fiican oo xooluhu ku dhargaanna leh” ayay tiri Istaahil.

Istaahil ayaa u sheegtay Raadiyo Ergo, in xerada barakaca Wisil ay wali ka qaadaneyso raashin gargaar ah oo barakacayaasha la siiyo dhamaadka bil kasta. Hay’ado samafal ah oo Cesvi iyo IRC ay kamid yihiin ayaa xerada raashinka ka bixiya.

Deeqo Faarax Xasan oo heysata siddeed carruur ah, ayaa kamid ah dadka kale eek a faa’iideystay xoolo qeybinta.

Waxay saddex sano barakac ku ahayd xero ku taalla deegaanka Ceel-guula. Raadiyo Ergo ayay u sheegtay in bartamihii bishaan November la siiyay shan neef oo ari ah, ayna ula guurtay miyiga Ceel-guula oo markii hore ay ka soo barakacday.

“Durba ri ayaa ii irmaan oo ii dhashay. Markii horaba danta ayaa nagu khasabtay ee dad magaalo ma ahayn mana jeclayn ku noolaanshaheeda, haddana waxaan heystaa fursad aan nolosheenii hore dib ugu billaabo,” ayey tiri Deeqa.

Waxay Raadiyo in sheegtay in boqol neef oo ari ahaa oo ay ku dhaqan jirtay miyiga ay abaarti ka leysay, haatanna waxay ku dedaaleysaa sidii ay neefafka la siiyay u dhaqaaleysan laheyd si ay ugu tarmaan.

Axmed Daahir Cali oo kamid ah mas’uuliyiinta Cesvi ee gobolka Mudug oo aan la xiriirnay ayaa xaqiijiyey in hay’adoodu bixisay xoolaha. Inkastoo aan isku dayno in aan xog intaas sii dhaafsiisan ka helno, haddana kama uusan jawaabin wicitaanno aan sameynay.

Post your comments

Jawaab ka bixi

Please enter your comment!
Please enter your name here