Beeraleyda gobolka Shabeelaha Dhexe oo laga caawinayo dib-u-habeynta kanaalada waraabka

0
145

Ergo: Beeraleyda ku nool afar tuulo oo hoos tagta degmada Jowhar ee gobolka Shabeelaha dhexe, ayaa laga caawinayaa dib u habeynta kannaalladii ku burburey fatahaadda webiga.

Waxaa laga hagaajinayaa meelaha uu wabigu ka jilicsan yahay, si looga hortago fatahaadda webiga, iyadoo la caro tuurayo hareeraha kanaalada iyo meelaha uu webiga ka jilicsan yahay.

Mashruuca lagu dhisayo kannaallada oo ah barnaamij cunto shaqo ku badalasho, ayaa waxaa ka faa’iideysanaya kun iyo lixdan iyo sagaal qoys, oo ay saameyn ku yeelatey fatahaaddii xiligi Guga ee wabiga Shabeelle.

Guud ahaan tuulooyinka wax laga qabanayo waa afar oo kala ah Gunbe, Banaaney, Baareey iyo Kaluundi, iyagoo sameynaya caro tuur iyo kanaal qodis.

Sida loo soo kala xulay waa Gunbe 288, Banaaneey 289, Kaluundi 246 iyo Baareey 246. Kaluundi iyo Baareey waxey sameynayaan caro tuur, halka Gunbe iyo Banaaney ay sameynayaan kanaal qodis.

Mashruucan ayaa soo socday illaa iyo bishii July ee sanadkan, iyadoo beeraleyda la siinayey cuntooyin kala duwan saddexdii bilood ee hore.

Bishii hore ee September iyo midan aynu ku jirno ee October, kaar u dhigma US $75 oo cunto ah, ayaa la siiyey beeraleyda.

Kaararka ayey la tagayaan beeraleyda baqaaro ay hey’adda WFP xiriir leeyihiin oo heysta mashiin, iyadoo loogu badalo bariis, sonkor, baasto, bur iyo caano boore.

Muxumad Ismaaciil, waa guddoomiye ku xigeenka guddiga beeraleyda ee tuulada Banaaney ee gobolka Shabeelaha dhexe, wuxuu sheegay in tuuladiisa ay kamid tahay kuwa kannaalada loo qodayo.

Tuuladiisa waxaa degan qoysas gaaraya illaa iyo 890, kuwaasoo 289 ka tirsan ay ka shaqeeyaan mashruuca.

“Dadka lasoo xulay ee qoysaska ka socdo waxey qodayaan 2 mitir, waxaa nalga kaalmeeyaa dhanka cuntada, si shaqadeena aan u qabsanno,” ayuu yiri Muxumed Ismaaciil.

Dadkan ayuu sheegay in markii mashruuca la billaabayay ay qaadan jireen masaggo oo kali ah, in kastoo bishii Septembar ee la soo dhaafay loo billaabay in lacagta US$75 la siiyo.

‘’Dadka, ka shaqaynaya mashuurcan waxaa soo xuley hoggaanka beeraleyda ee tuulooyinka, waxayna u kala qiimeeyeen sida ay u kala baahi badan yihiin.’’ ayuu yiri sarkaalka kasocda hey’adda Intersom.

Wuxuu sheegay in tuulooyinka Kaluundi iyo Baarey ay iyagu caro tuurayaan sagaal boqol oo mitir, oo ah dhulka webiga ku teedsan, dadkana la siiyay qalabka ay u baahan yihiin inay isticmaalaan.

’Waxaan ku dooranay tuulooyinkan afarta ah, waxay ahaayeen tuulooyinkii ugu darnaa ee fatahaaduhu saameeyeen, dhanka baahiyahoodana aan u gudbinay hey’adda, maaddaama ay wabiga hareerahiisa degan yihiin,’’ ayuu yiri mar kale sarkaalka Intersom

Mashruucan ayaa waxaa fulinaysa hay’adda Intersom, oo wakiil ka ah hay’adda cuntada adduunka WFP.

Sarkaal ka tirsan hay’adda Intersom oo ka shaqeynaysay barnaamijkan, ayaa sheegay in mashruucan uu ku eg yahay dhammaadka bishan, oo ay ku qodayaan afar km ilaa toddobo boqoloo mitir oo kannaalka dhexdiisa ah.

Wuxuu ka dambeeyay mashruucan markii ay ka duugmeen kanaallada ay ku waraabsan lahaayeen beeraha tuulooyin katirsan degmada Jowhar, waxaa hadda ay dadku u diyaar garoobayaan sidii ay u abuuran lahaayeen beerahooda.

 

Post your comments

Jawaab ka bixi

Please enter your comment!
Please enter your name here