Dhalinyarada ka tahriibaysa xeryaha Dhadhaab oo soo kordhaysa

0

(ERGO) Nadiifo Cabdi Salaax waa hooyada Bishaar Maxamed Dhuubow oo ah wiil 20 jir ah oo 4ta Abril ee sanadkan ka tegay xerada Dhagaxlay, si u gaaro dalka Liibiya, Bishaar oo dhiganayay fasalka labaad ee Dugsiga sare ee Tawakal kuna yaal Dhagaxley, wuxuu 23kii May hooyadii Nadiifo kala soo hadlay dalka Liibiya.
Nadiifo oo hor fadhisa guri yar oo dhoobo ka samaysan oo ah gurigii uu seexan jirey wiilkeedii tahriibay ayaa sheegtay in Bishaar hadda uu gacanta ugu jiro kooxaha ma gefayaasha ee wax tahriibiya, isagoo qaba dhaawacyo xabado ah oo ay ku dhufteen, wuxuu ka jaban yahay lugta midig, waxaa kale oo habeen kasta loo geystaa ciqaab kala duwan, iyagoo dalbanaya sagaal kun oo dollar oo madax furasho ah.
Nadiifo waxay bishaar aabihiis kala tageen iyada oo leh uurkiisa 3 bilood, iyada ayaana soo korisay, waxay soo gashay xeryaha qaxootiga ee Dhadhaab 2008, isagoo markaas wiilkeedu 10 sano jir ahaa, hadda waxay haysataa 7 carruur ah oo ay nin kale u dhashay.
“Lacag aan ku bixiyo ma hayo, wiilkana dhibkiisa iyo jirdilkiisa afar iyo Labaatan saac intaa la I soo Waco ayaa la i maqashiiyaa,” Ayey tiri Nadiifo
Wiilkeedu wuxuu ka mid yahay dhalinyaro 100 kor u dhaafaya oo tan iyo bishii Janaayo ee sanadkaan ka tahriibay saddexda xero qaxooti ee Dhadhaab Kenya, iyagoo u tahriibay dalka Liibiya si ay halkaa uga sii gudbaan dalalka reer Yurub oo ay is leeyihiin waxaad ka heli kartaan nolol dhaanta tan xeryaha Dhadhaab, siday sheegtay Xabiibo Cabdiraxmaan Mursal oo ah gudoomiyaha xerada qaxoootiga ee Dhagaxlay oo ay ka tahriibeen 45 ka mid ah dhallinyartaasi.
Xabiibo ayaa u sababaysay tahriibkaan badan ee ka jira xeryaha fursadihii dib u dejinta qaxootiga loogu samayn jirey dalka Mareykanoo oo joogsaday bishii Janaayo 2017, markaasoo madaxweynaha Mareykanka Donald Trump uu ku dhawaaqay in qaxooti ay kuwa Soomaalidu kamid yihiin laga mamnuucay in ay Mareykanka soo galaan.
“Dhallinyarada qaxootiga ma helaan waxbarasho jamacadeed marka ay dhameeyaan dugsiyada sare iyo iyagoo aanan shaqooyin helin, sidoo kale kuma qanacsana barnaamijka dib u celinta qaxootiga dib loogu celinayo Soomaaliya, iyadoo qaar badan oo ka mid ahi ku dhasheen xeryaha oo aysan weligood arag wadankoodii” Ayey tiri Xabiibo.
12 ilaa 17-kii July waxaa Xerada qaxootiga ee Dhagaxlay ka tegay 8 dhallinyaro oo dhiganayay dugsiyada sare ee Dhagaxlay, iyadoo oo uu fududeeyey qof dadka tahriibiya oo ku xiran shabakadaha dadka geeya Liibiya, waxaana dhamaantood laga soo qabtay jidka u dhexeeya Garisa iyo Nairobi, soo qabashadooda waxaa fududeeyey laamaha amaanka oo kaashanaya waalidiinta carruurta dhalay.
Waxaa la saaray maxkamad afar ka mid ah, iyadoo lagu eedeeyey inay tahriibayeen, markii la hubiyey sharciyadooda qaxootinimo waxaa lagu xukumay 20 kun oo shillin, waxaana 26kii July dib loogu celiyey xeryaha markii waalidkood ay ka bixiyee lacagihii lagu xukumay.
Xaiimo Diiriye Shaalle waa hooyada Cabdiwahaab Maxamed Cabdi oo 20 jir oo isagu ka mid ah afarta weli ku xiran Garisa, waxay sheegtay in ay 12 July ay weyday Cabdiwahaab, saacado kadibna ay is heleen waalidiin kale oo iyana raadinaya dhalinayaro kale oo ay wada dhiganayeen dugsiga sare ee Dhagaxley.
“Waxaan markiiba war gelinay laamaha amaanka maqnaanshaha wiilkayga, weligayna ma filayn inuu tahriibayo” Ayey tiri Xaliimo.
Cabdiwahaab Maxamed Cabdi oo ku dhashay xeryaha Dhadhaab 1998 ayay hooyadii Xaliimo sheegtay in uu yahay agoon uu aabihii geeryoodey isaga oo markaa jirey 6 bilood oo keliya, ayna xeryaha soo gashay 1992, iyadoo ka soo carartay dagaaladdii sokeeye ee Kismaayo ka socday.
“Maxkmaddu waxay ku ganaaxday 120 kun, waxaan hadda soo daynsaday lacag 150 kun oo aan u sii dhiibayo dad ka soo daynaya xabsiga” Ayey tiri Xaliimo.
Xabiibo Cabdiraxmaan Mursal oo ah gudoomiyaha guud ee Xerada qaxootiga ee Dhagaxlay ayaa sheegtay in dhacdooyinkan cusub ee tahriibka ay sii cakirayaan xaaladda qoysaska qaxootiga maadaama aan dadka qaxootiga ahi awoodin tobanaanka kune e dollar ee tahriibka iyo madax furashada ugu baxaya dhalinyarta.
26kii July ayaana waxaa isugu yimid kulan ay isugu yimaadeen waalidiinta, hogaamiyayaasha xaafadaha xerada Dhagaxley iyo gudoomiyaha loogana arrinsanayo sidii loola tacaali lahaa, iyo in dhalinyarada la wacyi geliyo, waalidiintuna ay xiriir dhow la sameeyaan laamaha amaanka si ay markay waayaah wiilkooda ay u war geliyaan, iyadoo ay jiraan waalidiin aan iyago sheegin ilmahooda tahriibay welina ka maqan.

Jawaab ka bixi

Please enter your comment!
Please enter your name here