Garoowe: Idaacad dembi lagu waayay

0

Maxkamadda gobolka Nugaal ayaa talaadadii dembi ku weysay idaacad maxali ah oo maamul goboleedka Puntland uu ku eedeeyay ‘been-sheegid’. Idaacada oo Sahan la yiraahdo ayaa lagu dacweeyay war bogeeda intarneetka lagu daabacay oo sheegayay in dhaqaale xumi heysto maamulka ay horseedi doonto in aan xus weyn loo sameyn maalinta aas-aaska Puntland. Raadiyaha waxaa kale oo lagu eedeeyay in uu baahiyay war dowladu ku sheegtay ‘been-abuur’ oo ah Shabaab koofur kasoo qaxay uu imaanaya dhulka maamulku ka taliyo. Laakiin garsooraha koowaad ee maxkamada gobolka Nugaal Sheekh Cabdinuur Jaamac ayaa sheegay in maxkamadu dembi ku weysay idaacada.

Kiiska oo furay labo toddobaad kahor ayaa noqonaya kii ugu horreeyay ee noociisa ah ee warbaahin lagu maxkamadeeyo, sida  uu sheegay Faysal Khaliif oo ah madaxa Ururka Warbaahinta Puntland. “Waa talaabo horey loo qaaday in dowladdu ku qanacday in sharciga iyo garsoorka lagu kala baxo,” ayuu yiri Faysal.
Sida horey u dhici jirtay, maamulka uma baahan jirin warqad maxkamadeed si loo xiro weriye ama warbaahin sheegtay war dowladdu dhibsato. Se, ciidamada ayaa u dhici jiray xarumaha warbaahinta, iyagoo weriyayaasha muddo dheer xabsi ku heyn jiray kadibna maxkamad la’aan sii deyn jiray. “Kiiskan wuxuu ka dhigan yahay in maalmihii weriyayaasha la iska xiri jiray laga gudbay,” ayuu Faysal hadalkiisa raaciyay.

Madaxweynaha maamul goboleedka Puntland Cabdiweli Gaas wuxuu xilligii uu mucaaradka ahaa u balan-qaaday warbaahinta xorriyad iyo madaxbanaani. Laakiin weriyayaashu ma aysan helin xorriyad weyn oo ku naaloodaan 20-ka bilood ee uu madaxweynaha yahay. Labo bilood kahor waxaa muddo 24 saacadood ah ku xirnaa magaalada Garoowe labo weriye oo ka tirsan Raadiyoow Daljir iyaga oo aysan maxkamad xukumin. Waxaa la siidaayay iyaga oo aan maxkamad la horgeen.

Si kastaba, Wasaarada Warfaafinta Puntland ayaa sheegay in maxkamad geynta Raadiyaha Sahan in ay qeyb ka tahay dedaalka lagu badelayo dhaqanka ah in weriye la iska xiro. Agaasimaha Wasaarada Mowliid Abubakar Abkey ayaa xusay in ay garowsideen in  garsoorku yahay halka keli ah ee si hufan loogu kala bixi karo. “Waxaan dhiirigelineynaa dhaqanka ah in sharciga lagu kala baxo. Haddii sharcigu dembi ku helo warbaahinta ama cidda la eedeeyay, waxaa la marsiin doonaa ciqaab sharci ah. Haddii maxkamadahu dembi ku waysana waa in la sii daayo,” ayuu yiri Mowliid.

Post your comments

Jawaab ka bixi

Please enter your comment!
Please enter your name here