Nolosha maxamed meeris oo ka tirsanaan jiray booliiska soomaaliya

0

Maxamed Ibraahim Cali (Meeris) oo ah Aabbe 54 sano jir ah, lehna 6 carruur ah oo hooyadood ay geeriyootay, kuna nool xerada barakacayaasha Jowle ee magaalada Garowe, gacan ayuuna naafo ka yahay, wuxuu muddo 10 sano ah ku dhex jiray iibinta lowska, oo uu maalin walba u guntado sameyntiisa, si uu ugu suuq geeyo  magaalada, halkaasoo wuxuu kasoo helo uu carruurta ku quudiyo.

Ilaa 5,000 bacood oo lows ah ayuu maalin walba suuqa u qaadaa, wuxuuna ka faa`iidaa 150,000 shillin Soomaali ah, una dhiganta $7.

“Lacagtaas ma aha mid ku filan qoyskeyga, howsha aan qabtana uma qalanto, waad dareemi kartaa intaasoo bacood inaan gacmaheyga ku sameeyo, maalin dhan bay igu qaadataa hagaajintooda, xirfad waxaan ka aqaan dhismaha guryaha, laakiin awood uma hayo maaddaama aan naafo ahay, marka xirfaddan unbaan iska biyabiyeystaa,” ayuu yiri Meeris.

Meeris , weligiis kuma fekerin nolol caynkan oo kale ah, wuxuuse u sababeynayaa burburka dalka ku dhacay iyo qabyaaladda inay noloshiisa saameysay. Xilligii dowladdii Maxamed Siyaad Barre wuxuu Meeris ahaa sarkaal ka tirsan booliiska Soomaaliya, nolol fiicanna ku nool.

“Markii burburkii dhacay kadib ayaan bilaabay inaan carruurta u shaqeysto, sababtoo ah shaqadiina ma heli karin, dalkii waa lagu kala yaacay,” ayuu Ergo u sheegay Meeris oo aan dooneynin inuu xusuusto noloshiisii hore ama kusii dheeraado.

Meeris iyo dad kaloo badan oo nolo fiican ku noolaa, qaarkoodna xilal sare hayay xiligii dowladdii dhexe ee Soomaaliya ayaa haatan ku nool nolol hooseysa, qaarkoodna xerooyin qaxooti ku jira.

Cabdiraxmaan Maxamed Xaaji/FM

Post your comments

Jawaab ka bixi

Please enter your comment!
Please enter your name here