Gaadiidleyda u kala goosha baydhabo iyo muqdisho oo shaqo joojin sameeyay

0

Wadayaasha gawaarida isaga kala goosha magaalooyinka Baydhabo iyo Muqdisho ayaa shaqo joojin ku dhawaaqay laga bilaabo bishan Jannaayo, iyagoo ka cabanaya dil, kufsi, dhac iyo lacago baad ah oo ay waddada uga qaataan ciidamo ku lebisan diresyka ciidamada dowladda Soomaaliya.

Cabdi  Xasan oo ka mid ah gaadiidleydaas ayaa Ergo u sheegay in lacagihii ay shaqeysteen oo idil isbaaro looga qaato, oo wax faa`iido ah aysan taas ugu jirin, walibana loogu sii daro jirdil, dhac iyo kufsi rakaabka loo geysto.

Meesha ugu daran ayuu sheegay inay tahay degmooyinka Afgooye iyo Wanlaweyn ee gobolka Shabeellaha Hoose.

“Gaariga yar ee aan wado wuxuu qaadaa 7qof, waxaa lagu weydiinayaa lacag dhan 200,000 shilin Soomaali, haddaadan heynin waa lagu jirdilayaa, waxaan rumeysnahay inay yihiin milatariga dowladda, sababtoo ah ma jiro iska gashanaya dareyskooda dadkana dhacaya.” Ayuu yiri Cabdi.

Wadayaasha oo ku dibad baxayay gudaha Baydhabo ayaa soo bandhigay gawaari ay ka muuqato rasaas lala dhacay iyo darawallada oo dhaawacyo loo geystay ay ka muuqdaan. Xuseen Axmed Cali oo shalay kasoo galay Muqdisho wajigiisana uu ka muuqday dhaawac kasoo gaaray qoriga afkiisa oo lala dhacay ayaa sheegay in dhaawacan loo geystay isagoo isku dayaya inuu badbaadiyo haweenka gaarigiisa saarnaa oo ay nimankaas doonayeen inay kufsadaan.

“Waxaan ku adkeystay in intay dhibaateyn lahaayeen dumarka gaariga ii saaran ee aan aniga mas`uulka ka ahay inay aniga dhib ii geystaan, sidaas ayay ii jirdileen, waxayna iga qaateen lacag dhan 500,000 shilin Soomaali.”

Xuseen ayaa sheegay in muddo haatan laga joogo laba bilood ay dhibtan ku bilaabatay oo ay iska dulqaadanayeen, balse ay noqotay mid joogto ah.

Cabdiraxmaan Cabdi Xuseen oo isaguna darawal kale ah ayaa Ergo u sheegay in 2000,000 shilin Soomaali ay uga baxdo waddada oo isbaaro ahaan looga qaato, isla markaana aysan waxba uga soo harin lacagta, taasna ay u dhaanto iyagoo shaqada joojiya.

Wadayaashan ayaa cabasho u gudbiyay maamulka Koofurgalbeed ee xaruntiisu tahay Baydhabo, si arrintan wax looga qabto, waxayna sheegeen inay shaqo joojintu ay socon doonto ilaa inta cabashadooda wax laga qabanayo.

Muxudiin Xasan Maxamed/FM

Post your comments

Jawaab ka bixi

Please enter your comment!
Please enter your name here