Dad gaajo iyo harraad ugu geeriyooday meel u dhaxeysa Gerilley iyo Bu`aale

0
Photo | Dad biyo dhaamin loo sameynayo/Sawir/Keydka/Axmed Saalixi

Dad gaaraya ilaa 8 ruux ayaa gaajo iyo harraad ugu geeriyooday dhulka miyiga ah ee u dhaxeeya deegaanka Gerilley ee gobolka Gedo  iyo degmada Bu`aale ee gobolka Jubbada Dhexe, sida uu Ergo u sheegay Aar Maxamed Maxamuud oo ah guddoomiyaha deegaanka Gerilley.

Aar ayaa sheegay in dadka dhintay iyo 28 qof oo ay soo badbaadiyeen ay dhammaan ahaayeen xoolo dhaqatada deegaanka oo doonayey inay biyo iyo daaq xoolahooda ugu doontaan gobollada Jubbooyinka, balse naf ay la gaari waayeen halkaas.

“Deegaanka abaar ayaa ka jirta, ilaa muddo saddex sano ah, marka xoolalleydan waxay u socdeen deegaanno uu roob ka da`ay oo ka tirsan Jubbada Dhexe, balse oon iyo harraad ayay waddada ugu dhinteen.” Ayuu yiri Aar.

Sidoo kale Axmed Maxamed oo ka mid ah dadkii xoolo dhaqatada ahaa ee loo soo gurmaday kuna sugan Gerilley ayaa sheegay in dhul ilaa 130km u jira Gerilley oo ah dhul oomane ah ay tahay meesha ay dadka ku dhinteen.

“Markaan 5 cisho ku jirnay dhulkaas oo intii dhimatay maahee inta kalena ay halis ku jirto, ayaa waxaa gurmad inoo fidiyay dadka deegaanka.” Ayuu yiri Axmed.

8da qof ee dhimataya ayaa waxaa ku jiray wiil 12jir ah, halka 7da kalena ay dad waaweyn ahaayeen. Cali Ibraahim Fiidow oo ka mid ahaa isagana dadkii lasoo badbaadiyay ayaa sheegay in 7 ruux oo kale iyo xoolahoodana la la` yahay oo dakdii gurmadka sameynayay ay waayeen waddo ay u maraan.

Axmed Cumar Saalixi/FM

Post your comments

Jawaab ka bixi

Please enter your comment!
Please enter your name here