Barakacyaal codsaday in laga caawiyo hoyga

0
Photo | Sawir/qaar ka mid ah barakacayaasha Jawle/Cabdiraxmaan Xaji/Erg

Dadkaan ayaa hay’addaha samafalku tiindhooyin uga dhiseen duleedka xeradda Jawle ee Garowe, xagaagii dabaysha badnaa iyo dab ayaa baa’biiyey 70 tiindho, dadka ayaa hadda ku hoos nool guryo ka samaysan kartoomo iyo haraadiga qalabka guryaha lagu dhisto.

Aamina Maxamed Ibrahim 2012 ayey ka soo barakacday Baydhabo, iyadoona ku biirtay Kaam Ajuuraan oo gubtay sanadkii hore, waxaana la dejiyey kaamkaan  Bishii Juune ee 2013.

Waxay ka wel wel qabtaa caafimaadka carruurteeda, hoyga oo ku xun iyadoo markay u waramayso weriyaha Ergo ee Garowe roob uu da’ayey, “anniga afar carruur ah ayaa ii joogta, gurigeenii dab ayaa baa’bi’iyey waana nala soo raray Dahaba Diiriye iskuulkeedii ayaana nala ag dejiyey, kadibna hay’ad ayaa na soo qaabishay teendho ayaa nala siiyey, tiindhadii hadda laba sano ayey jirtaa, dabayl ayaa jeex jeexday, jiingado dug ah ayaan saartay bushkii, roobkana ma celinayso waad u jeeda oo waa soo da’aysaa, roobku guriga ayuu noogu soo gelayaa.

Dadkaani waa dad dan yar ah, waxay cayrsadaan nolosha qoyskooda, ma helaan adeeg caafimaad, waxaa ku yar helitaanka biyaha nadiifta ah iyo musqulaha, Aamina ayaa ka codsatay  hay’addaha samafalka inay ka war hayaan xiligaan roobka oo laga caawiyo dhinaca hoyga, caafimaadka carruurtooda, iyadoo sheegtay in wakhtigaan oo kale ay dilaacaan cudurrada shubanka iyo qabowga.

Cali Nur Cali oo u dooda dadka barakacayaasha ah kana mid ah dadkan oo wax laga waydiiyey xaaladda dadkaan barakacay ayaa sheegay “dadka qaar bushash ayey ku nool yihiin, 224 qoysna tindhooyin jeex jeexan roobkana aan iska celin karin ku jiraan, tiindhooyinkaani waxay jiraan sanad iyo ka badan oo waa duugoobeen, qoraxdii ayaana nuglaysay, amaankeenu waa fiican yahay, dhibka ugu daranse shaqo ma haystaan dadku, dadku waxay ka soo fogaadeen magaladda, dad badan ayaa tindhooyinka isaga guuray oo dhistay bushash ay leeyihiin, tiindhooyinka hadda jeex jeexani waa 90.

Cali ayaa sheegay in dadku magalada markay ka soo fogaadeen ay ku waayeen shaqooyinkii yar yaraa ee ay ka heli jireen noloshooda, waxaan codsanaynaa in haddii hoy naloo helayo nala siiyo, waxaa jira dad waalan oo ku dhex xiran tiindhooyinka.

Dadkan ayaa cabashadoodu imanaysaa iyadoo hadda ay da’ayaan roobab xoogan oo nolosha dadka hoygoodu liita aysan iska celin karin.

Cabdiraxmaan Maxamed

Post your comments

Jawaab ka bixi

Please enter your comment!
Please enter your name here