Dad harraad ugu geeriyooday Gobollada dhexe ee Soomaaliya

0

Inta la xaqiijiyey toddoba ruux ayaa ugu geeriyooday harraad tuulooyinka Labidagase iyo Cadaad oo ka tirsan degmada Matabaan ee gobolka Hiiraan, siday sheegeen odayaasha iyo samafalayaasha deegaankaas u ambabaxay kana tegey magaalada Guriceel ee gobolka Galgaduud, iyagoo u socday si ay usoo ogaadaan xaqiiqda dhabta ah ee ka jirta deegaannadaasi.

Nabad-doon Cabdi Xaashi oo ka mid ah dadka deegaanka  ayaa Ergo u sheegay: “Col badan waan arkay, abaarna waan arkay, dhibaato adduunna waan arkay,  cayr badan waan arkay, waxaan sheegayaa in dhibatada halkaa ka jirta  oo xanuunka badan, oo biyo la’aanta ah ay u dhinteen 7 ruux, waana mid kasii daraysa, haddii aan gurmad degdeg ah lala gaarinna, dad badan oo kale ay harraad u dhimanayaan, waxaan ku baaqyayaa in dadkaa loo gurmado oo fadhiga laga kaco.

Ugaas Xasan Ugaas  Maxamed Ugaas Nuur oo ka mid ah hoggaanka dhaqanka ee deegaanka ayaa dhankiisa wuxuu qayla dhaan u diray dowladda Soomaaliya isagoo Ergo u warramaya wuxuu yiri:

“Waxaa ka jira deegaannadan waa xaqiiq, dadkii shalay aan dirnay waxay sheegeen, duunyo iskaba dhaaf, dadkii ayaa dhimanaya, marka ganacsatada gudaha iyo dibadda waxaan ka codsaneynaa in aad gurmad gashaan si loo gargaaro dadkaas dhibban.

Deegaannada harraadku ka jiro ayaa ah inta u dhexaysa Balanbal, Matabaan, Gerijir ilaa xuduudda fog ee Itoobiya. Xilli roobaadkii guga oo aan weli waddanka ka di’in ayaana ah tan keentay inay guraan dhammaan goobihii biyaha laga heli jiray.

Maxamuud Cismaan/ MH

Jawaab ka bixi

Please enter your comment!
Please enter your name here