Sicir barar xooggan oo ka jira Buurdhuubo iyo Garbahaarrey

0
15 April, 2014 GEDO

Sare u kac aad u xooggan ayaa waxaa laga dareemayaa suuqyada iyo goobaha ganacsiga degmooyinka Buurdhuubo iyo Garbahaarrey ee gobolka Gedo,iyadoo arrimahaasina ay saameyn ku yeesheen nolosha dadka ku dhaqan degmooyinkaasi oo u badan qoysas danyar ah oo ay horey u ragaadiyeen abaaro iyo colaado soo noqnoqdey.

Sarakacaasi ayaa lala xiriirinayaa hakad ku yimid gaadiidkii xamuulka ahaa ee soo galayey degmooyinkaasi muddo ka badan ilaa 3 toddobaad, dagaallo dhowaan ka dhacay Buurdhuubo iyo weliba deggganaansho la’aanta ka jirta deegaankaasi, arrimahaas oo is biirsaday ayaa waxay keeneen in qiimaha raashiinka uu sare u kaco.

Noocyada raashiinka uu qiimahooda cirka isku shareeray ayaa waxaa ka mid ah masaggada, bariiska, burka, sokorta, saliidda iyo baastada, kuwaasoo ah cunnada daruuriga u ah dadka, iyadoo shey weliba uu ka sare marey labalaab qiimihii bil ka hor uu ka taagnaa degmooyinkaasi.

Faadumo Aadan Cali oo ka mid ah ganacsatada iibisa raashiinka ee degmada Garbahaarrey ayaa sheegtay inay hakad galeen raashiinkii ka imaanayey dhnaca magaalada Muqdisho oo inta badan soo gali jiray suuqyada magaalada Garbahaarrey.

“Bil kahor kiishka sokorta waxaa la iibin jiray SO.sh 700,000, bariiska SO.sh 680,000, burka SO.sh 800,000 balse hadda waxay dhammaantood marayaan SO.sh 1200,000.” Ayay tiri Faadumo.

Maxamed Ibraahim oo ka mid ah waxgaradka  degmada Buurdhuubo oo u warramayay raadiyaha Ergo, ayaa u sababeeyay qiimo kororkaan xaaladaha dagaallada ka dhacay deegaanka oo xirey dhammaan Waddooyinkii soo galayey magaalada, taasoo keentay in qiimaha raashiinka uu cirka isku shareero.

“Degmooyinka wax soo gala iyo wax ka baxa midna malaha, waxaaba khatar ah in raashiinku uu dhammaado oo dadku waxay cunaan waayaan, marka laga soo tago qiimaha sarreeya.” Ayuu yiri Maxamed.

Axmed Cumar Saalixi/FM

Jawaab ka bixi

Please enter your comment!
Please enter your name here