Barakacayaal ku qulqulaya Baladweyne

0
14 April, 2014 BALEDWEYNE

Boqollaal qoysas ah oo kasoo qaxay dagaallada ciidamada dowladda iyo kuwo AMISOM oo wada socda iyo kooxda Shabaab ku dhex maraya deegaanno ka tirsan Hiiraan iyo Bakool ayaa ku qulqulaya xerayaha barakacayaasha ee degmada Baladweyne.

Barakacayaashan oo u badan haween iyo carruur ayaa kasoo qaxay deegaannada Buulo Barde, Maxaas oo gobolka Hiiraan ka tirsan iyo degmada Xudur ee gobolka Bakool. Ku dhowaad soddon qoys oo barakacayaal ah ayaa toddobaad walba imaanaya degmada Balad weyne ee gobolka hiiraan ilaa horraantii bishii hore oo ay bilowdeen dagaallada ka dhanka ah Shabaab. Weriyaha Ergo ee gobolka Hiiraan Cabdullaahi Salaad ayaa sheegaya in barakacayaasha cusub ay ku biirayaan qoysas dhowr iyo labaatankii sano ee lasoo dhaafay ku noolaa shan xero oo ku yaal magaalada.

Qaar ka mid ah haweenka barakacayaasha ah ayaa ku dhalay xeryaha oo aan laheyn adeegyo caafimaad. Leyla Cabdinuur oo ah hooyo carmal ah oo heysta toddobo carruur ah ayaa ilmaheedii siddeedaad ku dhashay xerada labo maalin uun kadib markii ay timid.

Hooyadeed Khadiijo Kulmiye oo kala soo qaxday degmada Buulobarde ayaa dhalisay maaddaama aysan jirin howl-wadeenno caafimaad oo xeryaha ka howlgala.

“Gabadheydu weyba caafimaad qabtaa, laakiin cunno, tallaal iyo daawooyin kama heli karno xerada,” ayey tiri Leyla oo la hadashay raadiyaha Ergo. Ilmaha yar ee ay heysto wuxuu ku nool yahay nuujinta oo keli ah, laakiin iyadu waxa ay ku tiirsan tahay biyo oo keli ah, mana heli karto cunto ay cunto.

Ismahaan Cabdirisaaq, hooyo kale oo kasoo qaxday Xudur, ayaa sheegtay in siddeed carruur ah oo ay dhashay ula soo lugeysay degmada Tiyiigloow oo 90km u jirta Xudur, halkaas oo ay ka heshay gaari Baladweyne keenay.   “Ma heysanno hooy, cunto, biyo iyo daawo midna. wax nolol ah oo halkan taal ma leh,” ayey Ismahaan u sheegtay weriyaha Ergo ee Baladweyne.

Jawaab ka bixi

Please enter your comment!
Please enter your name here