Haween maalgelinaya dhismaha isbitaalka Gedo

0

Haween qurbojoog ah ayaa maalgelinaya dayactirka isbitaalka ugu weyn Gedo oo ku yaal degmada Garbaharrey. Luul Maxamed Aaden oo ka mid ah haweenka mashruuca wada ayaa sheegtay in dayactirka iyo qalabeynta isbitaalka oo ay baahi weyn u qabaan bulshada gobolka ay ku bixi doonto $400,000 oo doollar.

“Gedo waa gobol aad u ballaaran oo ilaa siddeed degmo ka kooban, oo aad u dad badan. Sidaas darteed, waxaan dooneynaa in aan bulshadeenna aan ka caawinno baahiyaha dhanka caafimaad ee heysta,” ayey tiri Luul oo la hadashey weriyaha Ergo ee gobolkaas.

Dhismaha isbitaalkan ayaa waxaa bilaabay dowladdii kacaanka 23 sanno kahor, balse dagaallada sokeeye ayaa hakad-geliyay dhammeystirkiisa iyo qalabeyntiisa.  Degmada waxaa keli ah oo hadda ku yaal xarun caafimaad oo kooban oo cudurka qaaxada lagu daweeyo iyo xarunta hooyada iyo dhallaanka.

Luul ayaa dhowaan dib ugu soo laabatay degmada Garbahaarrey kadib dhowr iyo labaatan sano oo ay qaxooti ku aheyd boqortooyada Ingiriiska. Haweenka kale ee mashruuca dib u dhiska iyo dayactirka isbitaalka ka wada ayaa ku kala nool Mareykanka, Fiillaan iyo Astureeliya.  Haweenka ayaa lacagta kasoo ururiyay asxaabtooda iyo ehelkooda.

Ammaanka soo hagaagaya ee dalka ayaa ku dhiirrigeliyay in haweenkan dib u soo noqdaan oo ay ka fikiraan caawinada bulshadooda ay ka qaxeen. Si kastaba, xaruntan caafimaad ayaa ka koobnaan doonta 40 qol oo bixin doona adeegyo caafimaad oo kala duwan.

Jawaab ka bixi

Please enter your comment!
Please enter your name here