Qoysas Qoryooley kasoo qaxay oo Sarkuusta degay

0

01 April, 2014 QORYOOLEY, SARKUUSTA

180 qoys oo kasoo barakacay dagaallada ka dhacay degmada Qoryooley ee gobolka Shabeellada Hoose ayaa degay xero cusub oo laga furay deegaanka Sarkuusta ee ku taal duleedka magaalada Muqdisho.

Qoysaska soo barakacay oo u badan haween iyo carruur ayaa kasoo qaxay guryahoodii oo ku yiil deegaanno toban ka badan oo ka tirsan degmada Qoryooley oo ciidamada dowladda iyo kuwo AMISOM ay saddex maalin kula dagaallameen al-Shabaab.

Qoysaskaas waxaa ka mid ah haween uur leh oo qaarkood ku dhalay xerada cusub ee dadka deegaannadooda kasoo qaxay ee ku taal jidka Muqdisho iyo Afgooye isku xira.

Xaawo Maxamed Xasan oo ka mid ah qoysaskaas ayaa saddexdii ugu yareyd carruurteeda kala soo qaxday degmada Qoryooley oo 100 km dhanka koofureed kaga beegan magaalada Muqdisho. Saddex kale oo ka mid ah carruurteeda iyo aabbahood ayaa weli ku harsan deegaannada ku dhow Qoryooley. “Gaadiid ma leh, annaga dhanna hal maalin ma aynan soo wada bixi karin,” ayey tiri Xaawo oo la hadashay weriye Ergo ka tirsan.

Hooyo kale oo lix carruur ah leh oo la yiraahdo Moolow Xasan ayaa iyana sheegtay in iyada iyo carruurteeda ay afar maalin usoo socdeen deegaanka Sarkuusta gaadiid xumo awgeed. Qaar ka mid ah qoysaska soo qaxay oo ay ku jiraan dad lixaadka la’a ayaa gaari dameerro ku yimid deegaanka Sarkuusta.

Jawaab ka bixi

Please enter your comment!
Please enter your name here