DADKII KA BARAKACAY DEEGAANKA TALEEX OO AY XANUUNNO LASOO DARSEEN

0

Dadkii dhowaan ka barakacay dagaalladii ka socday degmada Taleex ee gobolka Sool una barakacay tuulada Xalin oo 30km u jirta Taleex ayaa waxaa lasoo dersay xanuunno.

Barakacayaashan oo tiradoodu ay gaareyso 4350 qoys, ayaa waxay daadsan yihiin bannaannada, halka qaarkoodna ay maryo ka dhigteen hoy, sida uu Ergo u sheegay Xuseen Cabdi Maxamuud oo ah guddoomiyaha tuuladaasi Xalin.

“Dadkan nagu soo kordhay ma heystaan hoy, dhulkuna waa qabow, dadkna markii ay tuuladu qaadi weyday waxaan u qeybinnay tuulooyinka kale oo ay ka mid yihiin Afgooye, dooxooyinka, beeraha, Xeerta xalmeed iyo meelo kale., waxaan codsaneynaa in dadkan dhibaateysan wax loo qabto” Ayuu yiri Xuseen.

Dr Siciid Kaahin Shire oo ka tirsna howlwadeennada hay`adda Bisha Cas oo booqday deegaanka Xalin ayaa sheegay in xanuunnada ku dhacay barakacayaashan ay ka mid yihiin carruurta oo qabow iyo qufac la ildaran, cudurka Jadeecada iyo lafa xanuun dadka waaweyn ay ka sheeganayaan, qabowga jira dartiis.

Dr siciid kaahin shire oo radiyaha ergo lahadlay ayaa yiri waxaan tagnay meelo badan oo ka mid tahay xalin geedcali dhumay marka xanuuno badan ayay qabaan caruurtu waashumayaan waxa haya dadka qufacfarabadan ayaa haaya dadka marka hada waxaa naga dhamaatay daawadii aan wadanay, jadeeco ayaa sidookale kadilaacday deegaanka.

Aamina oo ka mid ah hooyo 29 jir ah oo leh 3 carruur ah ayaa sheegtay in mehrad yar oo shah ay ku kariso ay ku lahayd degmada Taleex, balse haatan xaaladda nololeed ay aad ugu adagtahay, oo hoy iyo cunto la`aan ay heysato.

“Dadka miyiga ka yimaada ayaa nagu caawiya wax yar oo caano ah, halkan nafteenna ayaana ula soo cararnay ee nolol kale ugu imaan” Sidaa waxaa yiri Ismahaan Saalax oo ah hooyo 8 carruur ah leh.

Aamina Xasan Muuse oo ah hooyo waayeel 60jir ah ayaa sheegtay inaysan weligeed barakicin, balse hadda dagaallada deegaankooda ka dhacay darteed ay usoo barakaceen.

Ugu yaraan toddoba qof ayaa lagu dilay, 15 kalena waa lagu dhaawacay dagaal u dhexeeyay ciidamo kala taageersan maamullada Puntland iyo Khaatumo, oo 28kii bishii November ka bilowday deegaanka Taleex. Khaatumo oo la dhisay sanadkii hore, Puntland iyo Somaliland ayaa wada sheeganaya maamulka deegaannada Sool, Sanaag iyo Ceyn.

Cabdikariim Olol/FM

Jawaab ka bixi

Please enter your comment!
Please enter your name here