Puntland: burcad-badeeda waa la cirib-tiray

0

Maamul goboleedka Soomaaliyeed ee Puntland ayaa sheegay in kooxaha burcad-badeeda ah ee maraakiibta shisheeye ka qafaalata xeebaha gacanka cadmeed iyo kan bad weynta Hindiya laga cirib-tiray xeebaha iyo barriga deegaanada Puntland.

Agaasimaha guud ee wakaalada la dagaalanka burcad badeeda ee wasaarada dekaddaha iyo gaadiidka badda ee Puntland Cabdirisaaq Maxamed Dirir ayaa Ergo u sheegay in ciidamada badda ee Puntland ay burburiyeen saldhigyada kooxaha burcad-badeedda ahi ku lahaayeen degmooyinka Eyl, Garacad iyo Baargaal oo ka tirsan goboladda Mudug iyo Nugaal.

Mudane Dirir wuxuu intaa ku daray in burcad-baadeedda deegaanada Puntland ku sugnaa ay u kala baxeen saddex oo kala ah: kuwo lasoo qabtay oo xabsiyada deegaanada Puntland ku xiran, kuwo iskood isaga dhaafay burcad-badeeda oo kadibna dhaqan-celin loo sameeyay iyo koox yar oo burcad oo deeganada Puntland ka qaxay.

Gudoomiyaha Gobolka Mudug ee maamul goboleedka Soomaaliyeed ee Puntland Maxamed Yusuf Jaamac ayaa isna sheegay in wacyigelin baalaran oo ay qaadeen dadka deegaanka, odayaasha, culimada iyo maamulka Puntland ay keentay in dhalinyaro badan howlaha burcad-badeednimada isaga haraan oo nolol caadi ah sameystaan.

Weriyaha raadiyaha Ergo Burhaan Maxamed Cabdi ayaa sheegaya in qaar ka mid ah dhalinyarada si iskood uga baxay burcad-badeeda lagu biiriyay ciidamada maamul goboleedka Soomaaliyeed ee Puntland, qaarkood kalena loo tababaray xirfado kale sida farsamada gacanta iyo korontada oo ay ku shaqeystaan, iyo kuwo da’ yaraa oo iyana goobihii dugsiyada waxbarasho dib ugu noqday.

9 bilood ka hor ayaa saldhigii ugu dambeeyay ee burcad-badeedu ku laheed deegaannka Garacad ee Puntland ciidamada maamulka gobolka ay kala wareegeen burcad-badeeda. Muddo sanad ah lama sheegin wax weerar ah oo kooxaha burcad-badeed Soomaali ah ay ka geysteen biyaha ku dhow Soomaaliya.

Si kastaba weriyaha raadiyaha Ergo ee deegaanka wuxuu sheegay in weeraradii hore ee burcad-badeeda ay dhaawac u geysteen dhaqaalaha iyo nolosha dadka caadiga ah ee Soomaaliyeed. Cabsi laga qabo kooxaha burcad-badeeda awgeed, waxaa kordhay qiimaha gaadiidka badeecada keena dekada dalka lagu soo raro. Sidaas awgeed, qiimaha badeecada si gaar ah kuwo laga soo dhoofiyo dalalka carbeed ayaa kor u kacay.

Agaasimaha guud ee wakaalada la dagaalanka burcad badeeda ee wasaarada Dakadaha iyo Gaadiidka Badda ee Puntland C/risaaq Maxamed Dirir wuxuu raadiyaha Ergo u sheegay in hoos u dhaca weerarada burcad-badeeda ay ka dhisheen jariif sharci-daro ah oo maraakiib shisheeye ay ka bilaabeen xeebaha dalka.

Burhaan Maxamed Cabdi/MA

Jawaab ka bixi

Please enter your comment!
Please enter your name here