DAD NAAFO AH OO TABABAR CAAFIMAAD UGA FURMAY KISMAAYO

0
253

Tababar dadka naafada ah lagu barayay habab ay shaqo ku abuuran karaan, ugana hortagi kaaraan cudurada faafa ayaa magaalada Kismaayo kusoo gaba-gaboobay axadii.

Tababarka ayaa waxaa loo qabtay 70 qof oo ka mid ah naafada ku nool magaalada oo isugu jira dadka deegaanka iyo kuwo deegaanadooda kasoo barakacay. Weriyaha raadiyoow Ergo ee Kismaayo ayaa soo sheegaya in haween ugu badnaayeen naafada kasoo qeyb-gashay tababarka soconayay labo maalin.

Dr Dubad Aadan Maxamed, Guddoomiyaha hay’ad maxali ah oo qaban-qaabisay tababarka oo la yiraa Huda ayaa raadiyoow Ergo u sheegay in ujeedka ugu weyn ee ay tababarka ka lahaayeen ay tahay kalsooni gelinta dadka naafada ah ee ku nool magaalada Kismaayo.

Dr Dubad wuxuu intaa ku daray in dadka naafada qaarkood iyaga oo awood iney shaqeystaan ay doorteen gacan hoorse, taas oo naafada kasoo qeybgashay tababarka loo sheegay iney u habooneen mustaqbalka fog.

Dr Dubad Aadan Maxamed, Guddoomiyaha Hay’ada maxaliga ah ee Huda wuxuu kale oo uu sheegay in dadka naafada ah ay ku dheeri-geliyeen abuurista ganacsi yar-yar oo ay naftooda iyo tan qoysaskooda ku maareeyaan. Guddomiyaha Hay’ada wuxuu u balan-qaaday dadka naafada ah ee kasoo qeyb-galay tababarka in ay la raadin doonan dhulal kiro la’aan ah oo ay miisas yar yar oo ganacsi ay dhigtaan kuwooda diyaarka u ah howshaas.

Inta uu tababarka socday waxay dadka naafada ah ay sidoo kale barteen sida ay naftooda iyo caruurtooda uga ilaalin karaan halista cudurada ay ka mid yihiin shuban-biyood oo ku badan qoysaska naafada ah iyo dadka soo barakacay.

Dr Dubad Aadan Maxamed wuxuu sidoo kale Ergo u sheegay in dadka naafada ah ee gaarayay 70ka qof lagu dheerigaliyay in ay caruurtooda keenaan xarumaha talaalka cudurada lixda ah ee dila caruurta oo dhawaan dalka ka bilaaban doona dhawaan.

Post your comments

Jawaab ka bixi

Please enter your comment!
Please enter your name here