Billowgii bishii August ee sanadkaan ayey ahayd markii hay,adda Qaramada midoobay u qaabilsan dhanka qaxootiga ee UNHCR ay xero qaxooti cusub oo lagu magacaabo Kaambicaws ay ka dhistay meel qiyaastii illaa 10km dhanka bari kaga beegan xerada weyn ee qaxootiga Xagar Dheere, waxaana xeradaasi ay u dhistay kumanaan qoysas Soomaaliyeed kuwaasoo ka soo hayaamaya abaaraha daran iyo colaadaha ku dhuftay Soomaaliya.
Dadka la soo dejiyay xeradaasi cusub ee Kaambicaws waxaa ka mid ah qoysas xoolo dhaqata ah kuwaasoo xoolahii ay lahaayeen ay kaga dhamaadeen abaaraha daran ee jira.
Aadan Sheekh Cabdi wuxuu ka mid yahay qoysaska cusub ee halkaasi ay soo dejisay hay,adda UNHCR, wuxuu Radio Ergo uga waramay xaaladda guud ee dhinaca nolosha ee ka jirta xeradooda, wuxuuna sheegay in xoolihii uu lahaa ay kaga le,deen abaaraha isagoona sheegay in halkaan ay ku heleen gar gaar aan sidaa u badnayn, dhinaca kale wuxuu xusay inay jiraan dhibaatooyin ku haysta gudaha xerada kuwaasoo ay ka mid yihiin caafimaad xumi iyo dhibaato dhinaca hoyga ah.
Xeradaan cusub ee Kaambicaws waxaa ku yar dhanka gaadiidka dadkuna waxay maalaan cagtooda markii ay rabaan in ay gaaraan xerada midaan ka weyn ee Xagar Dheere, gudaha kaamka waxaad ku arkaysaa teendhooyin badan oo ay ku qoran yihiin magaca hay,adda qaxootiga ee UNHCR,sidoo kale waxaa gudaha xerada dhex wareegaya gawaari booyado ah kuwaasoo dadka u qeybinaya biyo ay cabaan,kuwaasoo iyana ay ku xardhan yihiin magaca hay,adda OXFAM.
“Waxaa jira is badal badan oo kajira halkaan gaar ahaan dadka asalkoodu ku noolaa miyiga xooluhuna abaarta kaga lumen, waxayna dhibaatadda ugu weyn ee saamaynta ku yeelatay noloshooda tahay iyagoo u bartay in ay cunaan hilibka xoolaha iyo caanahooda laakiin halkaan lagama helo intaaba taasina waxay ku noqotay mid adkaysay noloshooda” sidaana waxaaa tiri Faaduma Yuusuf oo iyadu ah haweeney ka mid ah qoysaskii ka soo barakacay xaafadda Calanleey ee degmada Kismaayo, waxa sidoo kale ay sheegtay Faaduma in xerada looga dhisay teendhooyin ay tiri habeenkiina waa qabow aan celin Karin dhaxanta maalintiina wa kulayl diirku kugu dhagayo,waxana ay dhinaca kale u mahadcelisay hay,adda Alxaramayn oo ay sheegtay in ay abaal weyn u hayaan maadaama ay naga caawisay dhanka nolosha ayay hadalkeeda ku soo gabagabeysay Faduma.
Cabsida ugu weyn ee ka jirtay kaamka ayaa ahayd dhanka ammaanka laakiin hada ammaanku waa mid wanaagsan oo laisku hallayn karo kadib markii ay hawlgalo lagu sugayo amniga ay halkaasi ka billaabeen ciidamo boolis ah oo katirsan dawladda Kenya kuwasoo ka tirsan saldhiga booliska Xagardheere ,waxana ay habeenkii gaaf wareegaan xerada daafaheeeda iyo gudaheeda si ay u xaqiijiyaan ammaanka guud ee xerada,
Xeradaan cusub ee Kaambi caws ayaa waxaa mucaawinooyin kala duwan oo isugu jira bariis sonkor timir iyo agabya kale soo gaarsiiyay dawladda waddanka Turkiga iyo hay,adda Qatar charity taasoo ay wakiil uga tahay hay,adda Xaramayn
Xuseen Cabdi Ibraahim oo kamid ah dadka ku nool xeradaasi isla marahaantaana ka soo barakacay meel u dhaw degmada Kismaayo ee xarunta gobolka Jubada hoose ayaa sheegay in hay,adahaasi kheyriga aha ay soo gaarsiiyeen ,bariis,baasto,sonkor,iyo timir isagoona u mahadceliyay,hase ahaatee waxa uu intaasi ku daray in ayaantaan aanay helin wax gar gaara.
Qaar kamid ah qoysaska ku nool xeradaan cusub ee kaambi caws ayaa ku eedeeyay hay,adda qaramada midoobay u qaabilsan dhanka qaxootiga ee UNHCR inaysan siinin kaararki ay ku qaadan lahaayen raashinka iyagoona sheegay in muda ka badan laba bilood ay halkaasi ku sugan yihiin.dhinaca kale hay,adda UNHCR ayaa arrintaan ku micneysay in ay sii kordhayaan dadka ka soo talaabaya soohdinta ee soo gaaraya xeryaha qaxootiyada eek u yaala dalka Kenya taasina ay keentay ayay yiraahdeeen qulqulka dadka oo ay ku mashquuleen.
Dhamaad
Farxaan Lafoole/MH
