Show/Hide image Print

Caddaalad darrada oo ku qasbeysa haweenka inay tacaddiyada qarsadaan ama tahriibaan

05 November, 2013 BOOSAASO

 

Haweenka barakacayaasha ah ee ku nool xerooyinka magaalada Boosaaso ayaa qarsanaya tacaddiyada lagula kaco oo kufsigu uu ugu weyn yahay, kadib markii ay arkeen kiisas badan oo aan waxba laga qaban.

Axado Ibraahim oo 26 jir ah heysatana 4 carruur ah oo ku nooshahay kaamka buuraha ee bariga magaalada Boosaaso, waxaa dhammaadkii bishii hore kufsi loo geystay iyadoo uur 9bilood ah leh, taas waxay ku keentay inay dhibaato kala kulanto foosha iyo xilliga dhalmada.

“Laba maalmood ayaan foolanayay oo aan dhiig baxayay, kaddibna waa leygu qalay ilmaha, ced aan u raacdo kufsigaasna malaha amaba wax iiga qabaneysa.” Ayay tiri Axado.

Marka kiisaska noocan oo kale ah lala socodsiiyo booliiska, ayaa arrinta waxay ku dhammaataa in baritaankii lagu waayo caddeymo, sidaa darteedna uu kiiska halkaas ku dhinto.

“Dhowr kiis oo aan gudbinnay wax laga qabtay ma jiraan, sidaa daraaddeed waxaan ku qasbannahay in gabadhii la kufsado aan dhanka caafimaadka ka caawinno, oo sidaas ay isaga samirto.” Sidaa waxaa yiri Cali Barre Ismaaciil oo ah guddoomiyaha xeryaha barakacayaasha ee magaalada Boosaaso.

Haweenka iyo gabdhaha barakacayaasha ah ee la kufsado ayaa inta badan qarsada, iyagoo aaminsan in haddii ay sheegaan sirtooda un la ogaanayo ee aan waxba loo qabaneynin, sida ay qabto Ubax Khaliif Axmed oo u dhaqdhaqaaqda arrimaha haweenka . “Way quusteen haweenka kufsiga loo geysto, waxay waayeen ced la shaqeysa oo wax u qabata, sidaa darteed ay dhibkooda ula aamuseen.” Ayay tiri Ubax.

“Odayaal dhaqameed ayaa arrinta gala, oo wax caddaalad ah lama horkeeno ninkii kufsiga geystay, gabadhana ma hesho caddaalad, taas waxay ku qasabtaa haweenka la kufsaday inay takoor la dhuuntaan amaba ay isaga cararaan magaalada, iyagoo door bida inay galaan tahriib ay kaga gudbayaan badda oo ay ku gaaraan Yemen.” Ayuu yiri Cali Barre.

Cali Barre ayaa sidoo kale sheegay in meesha keliya ee ay maciin ula bidaan haweenka barakacayaasha ah ee tacaddiyada loo geysto ay tahay ururrada arrimaha haweenka ka shaqeeya, oo iyagu ka caawiya dhanka caafimaadka.

Khadra Maxamed Xasan/FM